Hukumat qaroriga 17-noyabr kuni kiritilgan o‘zgartirishlarga ko‘ra, O‘zbekistonda eski haydovchilik guvohnomasini almashtirish muddati 1 yilga uzaytirildi, deb xabar bermoqda Adliya vazirligining “Huquqiy axborot” kanali.
“Milliy haydovchilik guvohnomasining hamda avtomototransport vositasi ro‘yxatdan o‘tkazilgani to‘g‘risidagi guvohnomaning yangi namunalarini joriy etish chora-tadbirlari to‘g‘risida”gi hukumat qaroriga kiritilgan o‘zgartirishlarga muvofiq eski haydovchilik guvohnomalari quyidagi muddatlarda yangisiga majburiy almashtiriladi:
- 2010-yilgacha berilganlari — 2022-yil 31-martgacha;
- 2010–2020-yillarda berilganlari — 2022-yil 30-iyungacha;
- 2013–2015-yillarda berilganlari — 2022-yil sentabrgacha;
- 2015-yildan keyin berilganlari — 2022-yil 31-dekabrgacha.
Eslatib o‘tamiz, O‘zbekistonda haydovchilik guvohnomasini almashtirish muddati uzaytirilishi mumkinligi haqida 29-sentabr kuni o‘tkazilgan matbuot anjumanida Davlat xizmatlari agentligi direktori Ulug‘bek Muhammadiyev ma’lum qilgandi.
Davlat xizmatlari agentligi haydovchilik guvohnomasini yangisiga almashtirish xizmatini IIV YHXBB elektron tizimida texnik-profilaktik tadbirlar amalga oshirilishi munosabati bilan 12-noyabrdan boshlab vaqtincha to‘xtatgan.
O‘zbekistonda ID-kartaga ega haydovchilardan haydovchilik guvohnomasini ko‘rsatish talab etilmaydi.
Izoh (0)