Iroq Belarusdagi qochqinlar lageridan o‘z fuqarolarini evakuatsiya qilishni boshladi

Polsha-Belarus chegarasidagi iroqlik muhojirlarni evakuatsiya qilish uchun 18-noyabr kuni ertalab Iroq havo yo‘llari aviakompaniyasining birinchi samolyoti Bog‘doddan Minskka uchdi. Bu haqda “TASS” xabar berdi.

“Parvoz Iroq va Belarus hukumatlaridan rasmiy ruxsatnoma va ko‘rsatmalar olgandan so‘ng amalga oshirildi”, — dedi Iroq aviakompaniyasi bosh direktori Abbos Omran.

“RBK”ning Iroq Tashqi ishlar vazirligiga tayanib xabar berishicha, 430 nafar qochqin Iroqqa qaytish uchun ro‘yxatdan o‘tgan.

Iroqning Moskvadagi elchixonasi parvozlarni tashkil qilishni o‘z zimmasiga olgan. O‘z vataniga qaytmoqchi bo‘lganlarni to‘plash haqida 12-noyabr kuni e’lon qilingan, deyiladi diplomatik missiya saytida.

Sputnik agentligi ma’lumotlariga ko‘ra, Minsk milliy aeroportidan Iroqqa birinchi reys 13:45 ga (Toshkent vaqti bilan 15:45) rejalashtirilgan, unga ro‘yxatdan o‘tish allaqachon boshlangan. Migrantlar uchun uyga qaytish bepul bo‘ladi.

Polsha chegarasidagi muhojirlarning aksariyati Iroqdan kelgan. Belarus prezidenti Aleksandr Lukashenkoning aytishicha, 16-noyabr holatida “Bruzgi” chegara punktidagi lagerda 5000 nafar muhojir, xususan, 3000 dan ortiq iroqlik, 600 dan ortiq eronlik, 200 nafar liviyalik va boshqa mamlakatlardan kelgan muhojirlar bor edi. Bular, asosan, Germaniyada boshpana izlash va ishlash niyatida bo‘lgan kurd millatiga mansub kishilardir.

Yevropa Ittifoqi ma’muriyati muhojirlarni Polsha chegarasiga yetkazishni tashkil etishda ishtirok etgan barcha kompaniyalar va shaxslarga nisbatan sanksiyalar qo‘llash rejasini e’lon qilgach, bir qancha aviakompaniyalar Iroq va boshqa bir qator davlatlar fuqarolarini Belarusga tashishni chekladi. Masalan, Belarusning Belavia milliy aviatashuvchisi Dubaydan (Yaqin Sharqdagi eng yirik yo‘lovchi markazlaridan biri) Belarusga uchayotgan samolyot bortiga Afg‘oniston, Iroq, Yaman va Suriya fuqarolarini olib chiqmasligini ma’lum qildi. Xuddi shunday cheklov Birlashgan Arab Amirliklari rasmiylari tomonidan ham kiritilgan. Turkish Airlines ham Iroq, Suriya va Yaman fuqarolarini Minskka tashishdan bosh tortishini ma’lum qildi.

12-noyabr kuni Bag‘dod Minsk bilan to‘g‘ridan to‘g‘ri reyslarni to‘xtatdi. Iroq Tashqi ishlar vazirligi bunday qaror noqonuniy muhojirlar oqimini jilovlash maqsadida qabul qilinganini tushuntirdi. “Iroqning Moskva va Varshavadagi elchixonalari Belarus bilan chegarada bo‘lganlarni ixtiyoriy ravishda qaytarish bo‘yicha sa’y-harakatlarni muvofiqlashtirmoqda”, — deyiladi vazirlik bayonotida.