AQShda giyohvand moddalarni me’yordan ortiq qabul qilish oqibatidagi o‘limlarning yillik ko‘rsatkichi rekord o‘rnatdi. Bu haqda AQSh Kasalliklarni nazorat qilish va oldini olish markazining (CDC) dastlabki ma’lumotlariga tayanib, CNN xabar berdi.
CDC ma’lumotlariga ko‘ra, 2020-yilning aprelidan 2021-yilning apreligacha haddan ortiq dozadagi narkotikdan o‘lim holatlari avvalgi yilga nisbatan 28,5 foizga o‘sgan, so‘nggi besh yil ichida esa deyarli ikki baravarga ko‘paygan.
O‘tgan yil davomida 100 306 AQSh aholisi ushbu sabab ortidan vafot etgan. Giyohvand moddalar iste’molini oshirib yuborishdan o‘lim holatlarining eng katta o‘sishi G‘arbiy Virjiniya, Kentukki va Tennessi shtatlarida qayd etilgan.
O‘limga olib keluvchi giyohvand moddalar — asosan, opioidlar bo‘lib qolmoqda. Sintetik opioidlar, ayniqsa, fentanil so‘nggi 12 oy ichida me’yordan ortiq narkotikdan o‘lim holatlarining 64 foizini keltirib chiqardi.
Mutaxassislarning fikricha, giyohvand moddalarni haddan ortiq qabul qilish tufayli vafot etganlar sonining ko‘payishi koronavirus pandemiyasining oqibatlari hamda fentanilning keng tarqalishi bilan bog‘liq bo‘lishi mumkin, chunki ushbu moddani xalqaro transport cheklovlari sharoitida ham ishlab chiqarish birmuncha oson.
Izoh (0)