Ироқ Беларусдаги қочқинлар лагеридан ўз фуқароларини эвакуация қилишни бошлади

Польша-Беларусь чегарасидаги ироқлик муҳожирларни эвакуация қилиш учун 18 ноябрь куни эрталаб Ироқ ҳаво йўллари авиакомпаниясининг биринчи самолёти Боғдоддан Минскка учди. Бу ҳақда «ТАСС» хабар берди.

«Парвоз Ироқ ва Беларусь ҳукуматларидан расмий рухсатнома ва кўрсатмалар олгандан сўнг амалга оширилди», — деди Ироқ авиакомпанияси бош директори Аббос Омран.

«РБК»нинг Ироқ Ташқи ишлар вазирлигига таяниб хабар беришича, 430 нафар қочқин Ироққа қайтиш учун рўйхатдан ўтган.

Ироқнинг Москвадаги элчихонаси парвозларни ташкил қилишни ўз зиммасига олган. Ўз ватанига қайтмоқчи бўлганларни тўплаш ҳақида 12 ноябрь куни эълон қилинган, дейилади дипломатик миссия сайтида.

Спутник агентлиги маълумотларига кўра, Минск миллий аэропортидан Ироққа биринчи рейс 13:45 га (Тошкент вақти билан 15:45) режалаштирилган, унга рўйхатдан ўтиш аллақачон бошланган. Мигрантлар учун уйга қайтиш бепул бўлади.

Польша чегарасидаги муҳожирларнинг аксарияти Ироқдан келган. Беларусь президенти Александр Лукашенконинг айтишича, 16 ноябрь ҳолатида «Брузги» чегара пунктидаги лагерда 5000 нафар муҳожир, хусусан, 3000 дан ортиқ ироқлик, 600 дан ортиқ эронлик, 200 нафар ливиялик ва бошқа мамлакатлардан келган муҳожирлар бор эди. Булар, асосан, Германияда бошпана излаш ва ишлаш ниятида бўлган курд миллатига мансуб кишилардир.

Европа Иттифоқи маъмурияти муҳожирларни Польша чегарасига етказишни ташкил этишда иштирок этган барча компаниялар ва шахсларга нисбатан санкциялар қўллаш режасини эълон қилгач, бир қанча авиакомпаниялар Ироқ ва бошқа бир қатор давлатлар фуқароларини Беларусга ташишни чеклади. Масалан, Беларуснинг Belavia миллий авиаташувчиси Дубайдан (Яқин Шарқдаги энг йирик йўловчи марказларидан бири) Беларусга учаётган самолёт бортига Афғонистон, Ироқ, Яман ва Сурия фуқароларини олиб чиқмаслигини маълум қилди. Худди шундай чеклов Бирлашган Араб Амирликлари расмийлари томонидан ҳам киритилган. Turkish Airlines ҳам Ироқ, Сурия ва Яман фуқароларини Минскка ташишдан бош тортишини маълум қилди.

12 ноябрь куни Бағдод Минск билан тўғридан-тўғри рейсларни тўхтатди. Ироқ Ташқи ишлар вазирлиги бундай қарор ноқонуний муҳожирлар оқимини жиловлаш мақсадида қабул қилинганини тушунтирди. «Ироқнинг Москва ва Варшавадаги элчихоналари Беларусь билан чегарада бўлганларни ихтиёрий равишда қайтариш бўйича саъй-ҳаракатларни мувофиқлаштирмоқда», — дейилади вазирлик баёнотида.