AQSh Davlat kotibi Entoni Blinken Rossiyani “diniy erkinlikni tizimli va qo‘pol tarzda buzish”ga sherik bo‘layotgan yoki o‘zi buni sodir etayotgan davlatlar ro‘yxatiga qo‘shdi. Bu haqda AQSh Davlat departamenti saytida xabar berilgan.
Diniy erkinlik sohasida alohida tashvish uyg‘otadigan davlatlar ro‘yxatiga, shuningdek, Tojikiston, Turkmaniston, Myanma, Xitoy, Eritreya, Eron, Shimoliy Koreya, Pokiston, Saudiya Arabistoni ham kiritilgan. Xuddi shunday xavotirli subyektlar ro‘yxatidan esa IShID va “Tolibon” joy olgan.
O‘z navbatida, Jazoir, Kuba, Nikaragua va Komor orollari diniy erkinlikning buzilishi bo‘yicha maxsus kuzatuvdagi davlatlar ro‘yxatiga kiritildi.
“Zamonaviy dunyoda din erkinligi muammolari tarkibiy, tizimli va chuqur ildiz otgan. Ular nafrat va murosasizlikka toqat qilishni istamaydigan barchadan global miqyosdagi doimiy majburiyatlarni, xalqaro hamjamiyatdan esa eng yuqori e’tiborni talab qiladi”, — dedi Blinken. Uning ta’kidlashicha, AQSh hukumatlarni mahalliy qonunlardagi kamchiliklarni tuzatishga undashda davom etadi va qonunbuzarliklar uchun aybdorlarni javobgarlikka tortadi.
Bir yil oldin AQSh Rossiyani diniy erkinliklarning buzilishi ustidan kuzatuvdagi davlatlar ro‘yxatiga kiritgan edi. Mamlakat qora ro‘yxatga avvalgi safar 2016-yilda kiritilgan, deb yozadi “Interfaks”. O‘shanda AQSh Davlat departamentining hisobotida Rossiya hukumati musulmonlar, ellikchilar, sayentologlar, shuningdek, “Iyegova shohidlari” oqimining faoliyatini cheklab qo‘ygani aytilgandi.
2020-yilda AQSh komissiyasi diniy erkinliklar sohasida O‘zbekistonni ilk bor “qora ro‘yxat”dan chiqargandi. 2005-yildan beri birinchi marta AQShning Xalqaro diniy erkinliklar bo‘yicha komissiyasi Davlat departamentiga O‘zbekistonni “diniy erkinliklar sohasida alohida xavotir uyg‘otadigan davlatlar” (CPC) ro‘yxatiga kiritishni taklif qilmagan.
Avvalroq AQSh senatorlari Turkmaniston prezidenti Gurbanguli Berdimuhamedovga ochiq xat yo‘llagan, Turkmanistondagi siyosiy mahbuslarni ozod etishga chaqirgandi.
Izoh (0)