Uzbekistan Airways aviakompaniyasi ob-havo noqulayligi sabab bir qator xalqaro reyslar parvozini kechiktirgani to‘g‘risida xabar berilgandi. Uzbekistan Airports’ning ma’lum qilishicha, Toshkent—Dubay yo‘nalishi bo‘yicha uchishi kerak bo‘lgan reysni kechiktirish uchun boshqa sabab ham bo‘lgan.
Ma’lum qilinishicha, Toshkent—Dubay yo‘nalishi bo‘yicha uchishi kerak bo‘lgan reys ob-havo sharoitidan tashqari, havo kemasi bortidan yo‘lovchilardan birining favqulodda tushib qolishi sabab kechiktirilgan. Ta’kidlanishicha, samolyot parvoziga oz qolganida unga telefon orqali yaqin qarindoshi vafot etganini ma’lum qilishgan va shu sababli u bortni tark etishga, shuningdek, o‘zining yuklarini olib ketishga qaror qilgan.
Toshkent vaqti bilan soat 14:05 da Boeing 787-8 Dubayga uchib ketgan. Uzbekistan Airways aviakompaniyasi bortdagi barcha yo‘lovchilarning ovqatlanishini ta’minlagan.
Ma’lum qilinishicha, ob-havo sharoiti bilan kechiktirilgan yana bir nechta xalqaro va mahalliy reyslar o‘z yo‘nalishi bo‘yicha uchib ketgan. Faqat Turkish Airlines aviakompaniyasining soat 09:45 da Toshkent—Istanbul yo‘nalishi bo‘yicha uchishi kerak bo‘lgan TK-369 reysi noma’lum muddatga qoldirilgan.
Telegram’dagi “Novosti Tashkentskogo neba” kanali kechiktirilgan reyslar uchib ketgani to‘g‘risidagi ma’lumotlar bilan bo‘lishdi.
- HY-271 Toshkent—Istanbul (jadval bo‘yicha soat 07:40 da, uchish — soat 10:42 da);
- HY-333 Toshkent—Dubay (jadval bo‘yicha soat 08:25 da, uchish — soat 14:04 da);
- HY-761 Toshkent—Olmaota (jadval bo‘yicha soat 08:25 da, uchish — soat 12:43 da);
- HY-3603 Toshkent—Moskva (jadval bo‘yicha soat 07:20 da, uchish — soat 08:54 da);
- HY-023 Toshkent—Buxoro (jadval bo‘yicha soat 13:30 da, uchish — soat 15:10 da);
- HY-011 Toshkent—Nukus (jadval bo‘yicha soat 07:15 da, uchish — soat 15:07 da).
“Ob-havo sharoiti yomonlashgani sababli 17-noyabr kuni rejalashtirilgan ba’zi bir qatnovlar vaqti kechiktirilishini ma’lum qilamiz. Ushbu munosabat bilan barcha yo‘lovchilar Uzbekistan Airways AJ aloqa markazi tomonidan qatnovlarning kechiktirilishi borasida xabardor qilinishlarini eslatib o‘tamiz. Yuzaga kelgan noqulayliklar uchun uzr so‘raymiz”, — deyiladi aviakompaniya xabarida.
Izoh (0)