Uzbekistan Airports Тошкент аэропортидан учиши керак бўлган рейсларнинг кечиктирилиши тўғрисида маълумот берди

Uzbekistan Airways авиакомпанияси об-ҳаво ноқулайлиги сабаб бир қатор халқаро рейслар парвозини кечиктиргани тўғрисида хабар берилганди. Uzbekistan Airports’нинг маълум қилишича, Тошкент—Дубай йўналиши бўйича учиши керак бўлган рейсни кечиктириш учун бошқа сабаб ҳам бўлган.

Маълум қилинишича, Тошкент—Дубай йўналиши бўйича учиши керак бўлган рейс об-ҳаво шароитидан ташқари, ҳаво кемаси бортидан йўловчилардан бирининг фавқулодда тушиб қолиши сабаб кечиктирилган. Таъкидланишича, самолёт парвозига оз қолганида унга телефон орқали яқин қариндоши вафот этганини маълум қилишган ва шу сабабли у бортни тарк этишга, шунингдек, ўзининг юкларини олиб кетишга қарор қилган.

Тошкент вақти билан соат 14:05 да Boeing 787-8 Дубайга учиб кетган. Uzbekistan Airways авиакомпанияси бортдаги барча йўловчиларнинг овқатланишини таъминлаган.

Маълум қилинишича, об-ҳаво шароити билан кечиктирилган яна бир нечта халқаро ва маҳаллий рейслар ўз йўналиши бўйича учиб кетган. Фақат Turkish Airlines авиакомпаниясининг соат 09:45 да Тошкент—Истанбул йўналиши бўйича учиши керак бўлган ТК-369 рейси номаълум муддатга қолдирилган.

Telegram’даги «Новости Ташкенцкого неба» канали кечиктирилган рейслар учиб кетгани тўғрисидаги маълумотлар билан бўлишди.

• HY-271 Тошкент—Истанбул (жадвал бўйича соат 07:40 да, учиш — соат 10:42 да);
• HY-333 Тошкент—Дубай (жадвал бўйича соат 08:25 да, учиш — соат 14:04 да);
• HY-761 Тошкент—Олмаота (жадвал бўйича соат 08:25 да, учиш — соат 12:43 да);
• HY-3603 Тошкент—Москва (жадвал бўйича соат 07:20 да, учиш — соат 08:54 да);
• HY-023 Тошкент—Бухоро (жадвал бўйича соат 13:30 да, учиш — соат 15:10 да);
• HY-011 Тошкент—Нукус (жадвал бўйича соат 07:15 да, учиш — соат 15:07 да).

«Об-ҳаво шароити ёмонлашгани сабабли 17 ноябрь куни режалаштирилган баъзи бир қатновлар вақти кечиктирилишини маълум қиламиз. Ушбу муносабат билан барча йўловчилар Uzbekistan Airways АЖ алоқа маркази томонидан қатновларнинг кечиктирилиши борасида хабардор қилинишларини эслатиб ўтамиз. Юзага келган ноқулайликлар учун узр сўраймиз», — дейилади авиакомпания хабарида.