Ekvador g‘arbidagi Guayakil shahrida joylashgan qamoqxonada yuz bergan to‘qnashuvlarda kamida 58 kishi halok bo‘ldi, 12 kishi yaralandi. Bu haqda Guayas provinsiyasi gubernatori Pablo Arosemenaga tayanib, “TASS” xabar berdi.
“Bizdagi ma’lumotlarga ko‘ra, 58 mahbus halok bo‘lgan, 12 nafar mahbus jarohat olgan, ularga tibbiy yordam ko‘rsatilmoqda”, — dedi u hudud hukumatining Facebook’dagi sahifasida efirga uzatilgan matbuot anjumanida.
Shu bilan birga, 24News Ekvador prokuraturasiga tayanib, tartibsizlik qurbonlarining soni 68 nafarga yetganini, yana 25 mahbus jarohatlanganini xabar qilmoqda.
To‘polon 12-noyabr kuni kechqurun boshlangan. Rasmiylarga ko‘ra, bunga o‘zaro raqib to‘dalar o‘rtasidagi to‘qnashuvlar sabab bo‘lgan. Mahbuslar sovuq qurollar, o‘qotar qurollar va portlovchi moddalardan foydalangan. Tartibsizliklar huquq-tartibot idoralari xodimlari tomonidan bostirilgan.
“Hozirda xavfsizlikni ta’minlash maqsadida qamoqxona ichiga politsiya xodimlari joylashtirilgan”, — dedi politsiya qo‘mondoni Tanniya Varela matbuot anjumanida.
28-sentabr kuni xuddi shu qamoqxonada yana bir to‘qnashuvlar bo‘lib o‘tgandi, o‘shanda 116 kishi halok bo‘lgan, 80 dan ortiq odam yaralangan. Natijada 119 mahbus halok bo‘lgan. Ekvador prezidenti Gilyermo Lasso mamlakatning axloq tuzatish muassasalari tizimida 60 kunlik favqulodda holat e’lon qilgan.
Izoh (0)