Эквадор ғарбидаги Гуаякил шаҳрида жойлашган қамоқхонада юз берган тўқнашувларда камида 58 киши ҳалок бўлди, 12 киши яраланди. Бу ҳақда Гуаяс провинцияси губернатори Пабло Аросеменага таяниб, «ТАСС» хабар берди.
«Биздаги маълумотларга кўра, 58 маҳбус ҳалок бўлган, 12 нафар маҳбус жароҳат олган, уларга тиббий ёрдам кўрсатилмоқда», — деди у ҳудуд ҳукуматининг Facebook’даги саҳифасида эфирга узатилган матбуот анжуманида.
Шу билан бирга, 24News Эквадор прокуратурасига таяниб, тартибсизлик қурбонларининг сони 68 нафарга етганини, яна 25 маҳбус жароҳатланганини хабар қилмоқда.
Тўполон 12 ноябрь куни кечқурун бошланган. Расмийларга кўра, бунга ўзаро рақиб тўдалар ўртасидаги тўқнашувлар сабаб бўлган. Маҳбуслар совуқ қуроллар, ўқотар қуроллар ва портловчи моддалардан фойдаланган. Тартибсизликлар ҳуқуқ-тартибот идоралари ходимлари томонидан бостирилган.
«Ҳозирда хавфсизликни таъминлаш мақсадида қамоқхона ичига полиция ходимлари жойлаштирилган», — деди полиция қўмондони Танния Варела матбуот анжуманида.
28 сентябрь куни худди шу қамоқхонада яна бир тўқнашувлар бўлиб ўтганди, ўшанда 116 киши ҳалок бўлган, 80 дан ортиқ одам яраланган. Натижада 119 маҳбус ҳалок бўлган. Эквадор президенти Гилермо Лассо мамлакатнинг ахлоқ тузатиш муассасалари тизимида 60 кунлик фавқулодда ҳолат эълон қилган.
Изоҳ (0)