Aleksandr Rar ismli nemis siyosatshunosi “Ukraina.ru” nashriga bergan intervyusida Belarus va Polsha chegarasida yuzaga kelgan migratsiya inqirozida uchinchi jahon urushining boshlanish xavfini ko‘rayotganini ma’lum qildi. Uning fikricha, vaziyatning keskinlashuvi oxirini aytib bo‘lmaydigan oqibatlarga olib kelishi mumkin.
Ekspertning ta’kidlashicha, Polsha Belarus bilan chegarada devor qurish rejasini tasdiqlagan, Belarus chegarachilari esa guvohlarga ko‘ra, qochoqlarni chegarani kesib o‘tishga undamoqda. Shuningdek, uning qo‘shimcha qilishicha, hozircha polshalik chegarachilar migrantlarni qo‘rqitish maqsadida o‘q uzmoqda, ammo chegarani ommaviy kesib o‘tishga urinish boshlansa, bu oldindan aytib bo‘lmaydigan oqibatlarga olib kelishi mumkin. Rar vaziyat ertami-kech nazoratdan chiqib ketishi mumkinligini qayd etgan.
“Borgan sari ko‘proq jiddiy tarixchilar, tahlilchilar biz Yevropada Birinchi jahon urushining boshlanishini yodga solgan vaziyatda yashayotganimiz haqida gapirmoqda. O‘shanda hech kim urushni xohlamagan edi va urush — bu ulkan qurbonliklarga olib keladigan telbalik deb hisoblangan, chunki barcha — nemislar ham, Rossiya, Fransiya va Angliya ham tish-tirnog‘igacha qurollangan edi”, — deydi siyosatshunos.
Biroq Rar Avstriya-Vengriya sobiq gersogiga o‘q uzilgani sabab Germaniya Rossiya va Fransiyaga urush ochganini eslab o‘tgan. Shundan kelib chiqib, u migrantlar bilan bog‘liq yuzaga kelgan vaziyatga jiddiy yondashishga chaqirgan.
Eslatib o‘tamiz, Belarus va Yevropa Ittifoqi mamlakatlari chegarasidagi migratsion inqiroz Aleksandr Lukashenkoning Minsk endi Yevropani muhojirlardan himoya qilmoqchi emasligini aytganidan keyin boshlandi. Shundan so‘ng, ommaviy axborot vositalarida xabar berilishicha, belaruslik chegarachilar chegarani noqonuniy kesib o‘tmoqchi bo‘lgan odamlarga jiddiy to‘sqinlik qilmaslik haqida yashirin ko‘rsatma olgan.
Izoh (0)