Checheniston rahbari Ramzan Qodirov qo‘shni ingush xalqi vakillarini millatchilik qilishga urinayotgan bir guruh provokatorlarni to‘xtatishga chaqirdi. Bu haqda u o‘zining “ VKontakte” ijtimoiy tarmog‘ida yozgan, deya xabar berdi “RBK”.
“Men qardosh xalqni millatchilik kartasini o‘ynashga urinayotgan ‘bir hovuch provokatorlarni’ to‘xtatishga chaqirdim. Qolaversa, bu masala bir marta va butunlay yopilgan hamda qonun hujjatlariga to‘liq mos keladi”, — dedi u.
Qodirov Checheniston va Ingushetiya chegarasida qurilish ishlari olib borilgani, bu vaqtda Fortanga tog‘ daryosining o‘zani o‘zgartirilgani haqidagi ma’lumotga shunday munosabat bildirdi.
Bir necha kun avval ijtimoiy tarmoqlarda Ingushetiyadagi Sunjenskiy tumanining Checheniston bilan chegaradosh Dattix qishloq posyolkasida og‘ir texnika ta’mirlash ishlari olib borilayotgani haqidagi ma’lumotlar paydo bo‘ldi. Amalga oshirilayotgan ishlar aks etgan videoni ham joylagan foydalanuvchilardan biri bo‘layotgan voqeani “qo‘shnilarning navbatdagi provokatsiyasi” deb atagan.
Checheniston parlamenti raisi Magomed Daudov Instagram’dagi jonli efirda daryo qirg‘og‘idagi ishlar Ingushetiya bilan chegara chizig‘iga hech qanday ta’sir ko‘rsata olmasligini aytdi.
“Ingushetiya” internet-gazetasining yozishicha, Sunjenskiy tumani hokimi qurilish ishlari haqida xabar topib, zudlik bilan o‘sha joyga borgan. Qurilish ketayotgani aytilgan joyga yetib kelgan tuman rahbari Magomed Dzeytov u yerda texnika va ishchilar yo‘qligini, biroq texnika ishining izlari hamda Fortanga daryosining o‘zani o‘zgargani ko‘rinib turganini aniqladi.
Tekshiruvdan so‘ng Dzeytov Chechenistonning Sernovodsk tumani rahbari Ismoil Isroilov bilan uchrashdi. “Isroilov ‘Chechenavtodor’ kompaniyasining uquvsiz ishchilari tomonidan jarlik chetidagi yo‘l to‘sig‘ini beton bilan to‘ldirish bo‘yicha ish olib borilganini, buning doirasida daryo o‘zani o‘zgartirilganini aytdi”, — deyiladi Sunjenskiy tumani ma’muriyati matbuot xizmati xabarida.
Xabarda ta’kidlanishicha, Isroilov yaqin orada daryo avvalgi o‘zaniga qaytarilishiga, shuningdek, hech qanday hududiy o‘zgarishlar rejalashtirilmaganiga ishontirgan. Bundan tashqari, Sernovodsk tumani rahbari kelajakda barcha ishlar faqat Ingush tomoni bilan kelishilganidan keyin amalga oshirilishini aytgan.
Checheniston va Ingushetiya o‘rtasidagi chegara hududlari uchun mojaro SSSR parchalanganidan keyin boshlangan, chunki respublikalar o‘rtasidagi chegara aniq belgilanmasdan, ular yagona Chechen-Ingush ASSR tarkibida edi. 1990-yillarda Ingushetiya va Checheniston Sunjenskiy va Malgobek tumanlari ustida hududiy bahs boshladi.
1993-yilda Joxar Dudayev ( 1991-yilda “Checheniston Ichkeriya Respublikasi”ni e’lon qilgan va 1996-yilda Rossiya federal qo‘shinlari tomonidan yo‘q qilingan chechen terrorchilarining yetakchilaridan biri) va Ingushetiya rahbari Ruslan Aushev shartnoma imzolagan, unga ko‘ra Sunjenskiy tumani Ingushetiyaga o‘tadi, undagi Sernovodsk va Assinovskaya aholi punktlari bundan mustasno.
2012-yilda Chechenistonda respublikalar o‘rtasidagi “ma’muriy chegarani aniqlashtirish va kelishish” uchun komissiya tuzildi. Yangi hujjatga ko‘ra, Ingushetiyaning Sunjenskiy tumani bir qismida joylashgan tog‘li va o‘rmonli hudud Chechenistonga, Chechenistonning Nadterechniy tumanidagi xuddi shunday hudud esa Ingushetiyaga o‘tgan.
2018-yil sentabr oyida respublikalar rahbarlari Ramzan Qodirov va Yunusbek Yevkurov ikki tuman o‘rtasidagi chegara to‘g‘risida kelishib oldi va bitim imzoladi. Shundan so‘ng Ingushetiyada kelishuvga qarshi qator mitinglar bo‘lib o‘tdi. Ular referendum yordamida chegara haqidagi qarorga qarshi chiqishga urindi, biroq respublika saylov komissiyasi arizani rad etdi. 2019-yil iyun oyida Yevkurov respublika rahbari lavozimidan ketdi, keyinroq Rossiya Konstitutsiyaviy sudi chegara haqidagi qarorni qonuniy deb tan oldi.
Izoh (0)