Чеченистон раҳбари Рамзан Қодиров қўшни ингуш халқини «бир ҳовуч провокаторларни» тўхтатишга чақирди

Чеченистон раҳбари Рамзан Қодиров қўшни ингуш халқи вакилларини миллатчилик қилишга уринаётган бир гуруҳ провокаторларни тўхтатишга чақирди. Бу ҳақда у ўзининг « ВКонтакте» ижтимоий тармоғида ёзган, дея хабар берди «РБК».

«Мен қардош халқни миллатчилик картасини ўйнашга уринаётган ‘бир ҳовуч провокаторларни’ тўхтатишга чақирдим. Қолаверса, бу масала бир марта ва бутунлай ёпилган ҳамда қонун ҳужжатларига тўлиқ мос келади», — деди у.

Қодиров Чеченистон ва Ингушетия чегарасида қурилиш ишлари олиб борилгани, бу вақтда Фортанга тоғ дарёсининг ўзани ўзгартирилгани ҳақидаги маълумотга шундай муносабат билдирди.

Бир неча кун аввал ижтимоий тармоқларда Ингушетиядаги Сунженский туманининг Чеченистон билан чегарадош Даттих қишлоқ посёлкасида оғир техника таъмирлаш ишлари олиб борилаётгани ҳақидаги маълумотлар пайдо бўлди. Амалга оширилаётган ишлар акс этган видеони ҳам жойлаган фойдаланувчилардан бири бўлаётган воқеани «қўшниларнинг навбатдаги провокацияси» деб атаган.

Чеченистон парламенти раиси Магомед Даудов Instagram’даги жонли эфирда дарё қирғоғидаги ишлар Ингушетия билан чегара чизиғига ҳеч қандай таъсир кўрсата олмаслигини айтди.

«Ингушетия» интернет-газетасининг ёзишича, Сунженский тумани ҳокими қурилиш ишлари ҳақида хабар топиб, зудлик билан ўша жойга борган. Қурилиш кетаётгани айтилган жойга етиб келган туман раҳбари Магомед Дзейтов у ерда техника ва ишчилар йўқлигини, бироқ техника ишининг излари ҳамда Фортанга дарёсининг ўзани ўзгаргани кўриниб турганини аниқлади.

Текширувдан сўнг Дзейтов Чеченистоннинг Серноводск тумани раҳбари Исмоил Исроилов билан учрашди. «Исроилов ‘Чеченавтодор’ компаниясининг уқувсиз ишчилари томонидан жарлик четидаги йўл тўсиғини бетон билан тўлдириш бўйича иш олиб борилганини, бунинг доирасида дарё ўзани ўзгартирилганини айтди», — дейилади Сунженский тумани маъмурияти матбуот хизмати хабарида.

Хабарда таъкидланишича, Исроилов яқин орада дарё аввалги ўзанига қайтарилишига, шунингдек, ҳеч қандай ҳудудий ўзгаришлар режалаштирилмаганига ишонтирган. Бундан ташқари, Серноводск тумани раҳбари келажакда барча ишлар фақат Ингуш томони билан келишилганидан кейин амалга оширилишини айтган.

Чеченистон ва Ингушетия ўртасидаги чегара ҳудудлари учун можаро СССР парчаланганидан кейин бошланган, чунки республикалар ўртасидаги чегара аниқ белгиланмасдан, улар ягона Чечен-Ингуш АССР таркибида эди. 1990 йилларда Ингушетия ва Чеченистон Сунженский ва Малгобек туманлари устида ҳудудий баҳс бошлади.

1993 йилда Жохар Дудаев ( 1991 йилда «Чеченистон Ичкерия Республикаси»ни эълон қилган ва 1996 йилда Россия федерал қўшинлари томонидан йўқ қилинган чечен террорчиларининг етакчиларидан бири) ва Ингушетия раҳбари Руслан Аушев шартнома имзолаган, унга кўра Сунженский тумани Ингушетияга ўтади, ундаги Серноводск ва Ассиновская аҳоли пунктлари бундан мустасно.

2012 йилда Чеченистонда республикалар ўртасидаги «маъмурий чегарани аниқлаштириш ва келишиш» учун комиссия тузилди. Янги ҳужжатга кўра, Ингушетиянинг Сунженский тумани бир қисмида жойлашган тоғли ва ўрмонли ҳудуд Чеченистонга, Чеченистоннинг Надтеречний туманидаги худди шундай ҳудуд эса Ингушетияга ўтган.

2018 йил сентябрь ойида республикалар раҳбарлари Рамзан Қодиров ва Юнусбек Евкуров икки туман ўртасидаги чегара тўғрисида келишиб олди ва битим имзолади. Шундан сўнг Ингушетияда келишувга қарши қатор митинглар бўлиб ўтди. Улар референдум ёрдамида чегара ҳақидаги қарорга қарши чиқишга уринди, бироқ республика сайлов комиссияси аризани рад этди. 2019 йил июнь ойида Евкуров республика раҳбари лавозимидан кетди, кейинроқ Россия Конституциявий суди чегара ҳақидаги қарорни қонуний деб тан олди.