Afg‘onistonda 2021-yil oxiriga qadar ocharchilikdan kamida 1 million bola halok bo‘lishi mumkin. Bu haqda Jahon sog‘liqni saqlash tashkilotining rasmiy vakili Margaret Xarrisga tayanib, “RIA Novosti” xabar berdi.
“Afg‘onistonda to‘yib ovqatlanmaslik sog‘liqni saqlash uchun katta chaqiruv kabi o‘sishni davom etmoqda. Baholashlarga ko‘ra, yil oxiriga qadar 5 yoshgacha bo‘lgan 3,2 million bola to‘yib ovqatlanmaslik oqibatida jabr ko‘rishi mumkin. Shuningdek, ularning kamida 1 millionida o‘lish xavfi mavjud”, — deydi Xarris.
Uning so‘zlariga ko‘ra, JSST Afg‘onistonning 23 ta viloyatidagi 47 ta tibbiyot muassasalarida ochlikdan qiynalgan bolalarni davolash uchun mablag‘ yo‘naltirgan, ammo bu “dengizdan tomchidek” gap.
Eslatib o‘tamiz, BMT Afg‘onistonga yordam ko‘rsatish uchun O‘zbekistonning Termiz shahrida asosiy logistika markazini ochgandi. Oktabr oyi o‘rtalarida ushbu logistika markaziga BMT Qochqinlar ishi bo‘yicha boshqarmasining Afg‘onistonga atalgan 100 tonnalik insonparvarlik yordami olib kelingan edi. Ushbu gumanitar yordam yuk mashinalariga ortilib, Termizdan “Hayraton” chegara punkti orqali Afg‘onistonning Mozori Sharif shahriga yetkazilishi lozim edi.
Ma’lumot uchun, 14-sentabr kuni O‘zbekiston Afg‘onistonga turli oziq-ovqat mahsulotlari, birlamchi zarur tovarlar, dori-darmonlar, kiyim-kechak va poyabzallardan iborat insonparvarlik yordami yuborgandi.
Izoh (0)