Qirg‘iziston Kollektiv Xavfsizlik shartnomasi tashkilotidagi (KXShT) vakili Berdibek Asanovni lavozmidan ozod qildi – endi uning o‘rnini Havo mudofaasi kuchlari qo‘mondoni o‘rinbosari Emil To‘qayev egallaydi. Bu haqda Bishkekdagi matbuot anjumanida respublika mudofaa vaziri Baxtibek Bekpo‘latov ma’lum qildi.
“Berdibek Asanovni lavozimga tayinlash vaqtida qonunbuzarliklarga yo‘l qo‘yilgan. Mudofaa vazirligi uning nomzodi Xavfsizlik Kengashi tomonidan tasdiqlanmagani haqida ma’lumot oldi. Men Xavfsizlik Kengashining hujjatiga asoslandim. Bundan tashqari, Asanovni lavozimidan ozod etishda uning ma’naviy va ishga oid sifatlari ham hisobga olindi”, — dedi vazir.
Bekpo‘latovning aytishicha, bundan tashqari Asanov unga pora berishga uringan.
“Faoliyatimning birinchi kunidanoq korrupsiyaga qarshi kurashish masalasini ko‘targanman. Poraxo‘rlik bilan shug‘ullanganlar mansab va martabalaridan qat’i nazar, ishdan bo‘shatiladi. Berdibek Asanov oldimga konvert bilan keldi, uni xonadan haydadim. Shundan so‘ng oldimga o‘rinbosarlarim kelib qoldi. U nima uchun pora taklif qilayotganini aytishga ulgurmadi. Bu qayd etilmagani va Asanovning qo‘liga kishan taqilmaganidan afsusdaman”, — deya xulosa qildi mudofaa vaziri.
O‘z navbatida, vazirlikning yuridik ta’minlash boshqarmasi boshlig‘i Baxtibek Moldoboyevning aytishicha, Berdibek Asanov 2009-yilda ikki yilga qamalgan. Keyinchalik Harbiy sud qarori bilan u Mudofaa vazirligi garoviga topshirilgan.
“Berdibek Asanov egallab turgan lavozim toifasida ofitser pokiza obro‘ga ega bo‘lishi shart. Uni Moskvaga jo‘natishganda, bu daqiqalar hisobga olinmagan. Xavfsizlik Kengashidan xat olingach, u lavozmidan olib tashlandi”, — deya tushuntirdi Moldobayev.
Asanov 2021-yilning may oyida Qirg‘izistonning KXShTdagi vakili etib tayinlangan edi. Oradan besh oy o‘tgach, Qirg‘iziston hukumati uni qaytarishga qaror qildi. KXShT Birlashgan shtab boshlig‘i o‘rinbosari lavozimida ishlab kelgan Asanov bu qarorni noqonuniy deb hisoblab, sudga da’vo arizasi bergan.
Asanov KXShTga tayinlanishidan oldin Qirg‘iziston Qurolli kuchlari Bosh shtabida ishlagan, 2019—2020-yillarda esa 8-gvardiya motoo‘qotar diviziyasi komandiri bo‘lgan. U mazkur lavozimdan “ishonchli bo‘linmalar ustidan nazoratning zaifligi, harbiy intizomning past darajasi va xizmatdagi kamchiliklar uchun” ozod qilingan. Qayd etilishicha, bunga shartnoma asosida xizmat qilayotgan askarni elektr toki urishi bilan bog‘liq favqulodda vaziyat sabab bo‘lgan.
Izoh (0)