Prezident Shavkat Mirziyoyev Turkiyaning Istanbul shahrida bo‘lib o‘tayotgan Turkiy tilli davlatlar hamkorlik kengashining navbatdagi sammitida kengashga a’zo davlatlar hamkorligi borasida bir qator takliflarni ilgari surdi. Bu haqda Prezident matbuot kotibi Sherzod Asadov xabar qildi.
Qayd etilishicha, Shavkat Mirziyoyev Turkiy kengash davlatlarining hamkorlik borasida hali ishga solinmagan ulkan imkoniyatlaridan to‘laqonli foydalanishga chaqirgan. Jumladan:
- tashkilot doirasida savdo aloqalarini kengaytirish uchun qulay va jozibador sharoitlarni yaratish;
- uchinchi davlatlardan kirib kelayotgan mahsulotlarni tashkilotga a’zo mamlakatlarda ishlab chiqarish mumkin bo‘lgan tovarlar hisobidan qoplash;
- turkiy davlatlar savdo hamkorligi bo‘yicha tadqiqot markazini tashkil etish;
- turkiy davlatlar tashkilotining transport sohasidagi o‘zaro bog‘liq dasturini ishlab chiqish;
- a’zo davlatlardagi ixtisoslashgan tashkilotlar negizida “Injiniring va texnologiyalar markazlari”ni tashkil etish;
- kelgusi yili O‘zbekistonda Turkiy davlatlar sanoat haftaligini o‘tkazish.
Shuningdek, Prezident 12-noyabr kuni Istanbulda Qirg‘iziston prezidenti Sadir Japarov bilan har ikki davlat o‘rtasidagi kelishuvlarni amalga oshirish masalalarini muhokama qildi. Muloqotda Xitoy—Qirg‘iziston—O‘zbekiston temiryo‘lini qurish loyihasini jadal ilgari surishga alohida e’tibor qaratildi.
Bundan tashqari, bugun sammit doirasida Turkiy kengash kotibiyatining yangi binosi oldida bayroq ko‘tarish marosimi bo‘lib o‘tdi. Unda O‘zbekiston, Ozarbayjon, Turkiya, Qirg‘iziston, Qozog‘iston, Vengriya, Turkmaniston va tashkilotning bayroqlari ko‘tarildi.
Izoh (0)