O‘zbekistonda Damas sotib olish uchun katta navbat yuzaga keldi. Spot’ning UzAvto Savdo bot ma’lumotlariga tayanib yozishicha, ayni paytda 26 650 kishi ushbu mashina yetkazib berilishini kutmoqda.
Boshqa modellar uchun navbatlar ham o‘sib bormoqda. Xabar e’lon qilingan vaqtda Cobalt uchun navbatda turganlar 16 296 nafarga, Lacetti’ga navbatda turganlar esa 38 028 nafarga yetdi. Spark’ni kutayotgan xaridorlar soni 2862 nafarga yetgan bo‘lsa, Nexia-3 ni 2367 kishi kutmoqda.
Hozirda sotuvda faqat premium-klassdagi modellar mavjud. Eng ko‘pi Malibu-2 — 159 dona. Shuningdek, 146 dona Trailblazer va 51 dona Equinox bor.
Ishlab chiqarishning qisqarishi
Davlat statistika qo‘mitasi ma’lumotlariga ko‘ra, 2021-yilda UzAuto Motors’ning aksariyat modellarini ishlab chiqarish qisqargan. 2021-yilning 9 oyida chiqarilgan Nexia avtomobillari shu davrga nisbatan 3,2 barobar, Spark 2,9 barobar kamaygan.
Cobalt va Lacetti-Gentra ishlab chiqarish 4 baravar qisqardi. Xususan, 2021-yilning avgust oyida atigi 2 ta Lacetti konveyerdan chiqdi. Kompaniya buni yangi ishlab chiqarish platformasini ishga tushirish bo‘yicha ishlar olib borilishi bilan izohladi, garchi bu yetkazib berish jadvaliga ta’sir qilmasligini avvalroq va’da bergan bo‘lsa ham.
Sentabr oyida UzAuto Motors Lacetti va Spark ishlab chiqarish qayta tiklanganini ma’lum qildi. Bundan tashqari, kompaniya har oyda qo‘shimcha 1000 dona Lacetti ishlab chiqarishni tashkil qildi. UzAuto Motors yig‘ilgan navbatlarni kamaytirishga va’da berdi, biroq navbatlar o‘sishda davom etdi.
Yaqin vaqtgacha Damas tanqis bo‘lmagan yagona asosiy model edi, qolaversa, ishlab chiqarilgan Damas va Labo’lar soni ortdi. Ammo hozir unga ham navbatlar yuzaga keldi.
Oktabr oyi oxirlarida kompaniya Labo va Lacetti avtomobillarini oktabr—noyabr oylarida kutilayotgan xaridorlarga yetkazib berish muddati 2 oyga uzaytirilishini ma’lum qilgandi.
Izoh (0)