Bandlik va mehnat munosabatlari vazirligi ijtimoiy tarmoqlarda O‘rta Chirchiq tumanida joylashgan maktabgacha ta’lim tashkilotlarning xodimlariga xodimlarini oylik maosh berilmasdan kelinayotgani yuzasidan tarqalgan xabarlarga munosabat bildirdi.
Ijtimoiy tarmoqlarda Toshkent viloyati O‘rta Chirchiq tumanidagi MTTlardagi xodimlarga oylik maosh to‘lab berilmayotgani to‘g‘risida xabarlar tarqalgan. Holat bo‘yicha Toshkent viloyati Bandlik bosh boshqarmasi Davlat mehnat inspeksiyasi tomonidan o‘rganish o‘tkazilgan.
O‘rganish davomida O‘rta Chirchiq tumani maktabgacha ta’lim tashkiloti xodimlariga 2021-yilning oktabr oyi uchun oylik ish haqlari to‘lab berilmagani hamda shanba kuni ishga jalb qilish bo‘yicha buyruq rasmiylashtirilmagani aniqlangan.
Yuqoridagilarga asosan, Davlat mehnat inspeksiyasi tomonidan maktabgacha ta’lim tashkiloti xodimlariga to‘lanishi lozim bo‘lgan qariyb 540 million so‘m oylik ish haqi undirib berilgan.
Shuningdek, O‘rta Chirchiq tumani maktabgacha ta’lim bo‘limi boshlig‘i tomonidan Mehnat kodeksining 154-, 161- va 157-moddalari (mehnatga haq to‘lash kafolatlari, ish vaqtidan tashqari ishlar hamda dam olish kunlari va bayram kunlaridagi ishlar uchun haq to‘lash, mehnatga haq to‘lash muddatlari) talablari buzilgani yuzasidan tashkilot rahbariga nisbatan Ma’muriy javobgarlik to‘g‘risidagi kodeksning 49-moddasi (mehnat va mehnatni muhofaza qilish to‘g‘risidagi qonunchilikni buzish) 1-qismiga asosan ma’muriy jarima qo‘llanilgan. Ta’kidlash kerakki, javobgarga nisbatan ushbu jazo turi qo‘llanilganda BHMning 20 baravarigacha miqdorda jarima (5,4 million so‘m) solinishi mumkin.
Avvalroq Qonliko‘lda tarbiyachilarning norozilik aksiyasidan so‘ng bog‘cha mudirasi lavozimidan chetlashtirilgani to‘g‘risida xabar berilgandi.
Izoh (0)