Nosozlik tufayli Yunusobod tumani to‘liq, Olmazor va Shayxontohur tumanlari esa qisman issiq suv va issiqlik ta’minotidan uzildi

12-noyabr kuni Yunusobod tumanidagi 4-issiqlik markazining elektr energiyasi ta’minotida nosozlik ro‘y bergani sababli mazkur qozonxonadan issiq suv va issiqlik uzatish vaqtincha to‘xtatildi. Bu haqda Toshkent shahar hokimligi matbuot xizmati xabar berdi.

Ta’kidlanishicha, buning oqibatida Yunusobod tumanida to‘liq, Olmazor va Shayxontohur tumanlarida esa qisman issiq suv va issiqlik ta’minotida uzilish kuzatilmoqda.

“Ayni paytda issiqlik markazida yuzaga kelgan nosozlikni bartaraf etish ishlari olib borilmoqda. Mutasaddilar soat 17:00 gacha issiq suv va kechki 00:00 ga qadar issiqlik ta’minoti to‘liq tiklanishini ma’lum qildilar”, — deyiladi xabarda.

“Toshissiqquvvati” DUK yuzaga kelgan noqulayliklar uchun uzr so‘raydi.

Eslatib o‘tamiz, 5-noyabr kuni chang bo‘roni sabab yuzaga kelgan nosozlik oqibatida Toshkentning katta qismi ichimlik suvisiz qolgandi.