O‘zbekistonda 2022-yilda elektr energiyasi va tabiiy gaz narxlari oshirilishi mumkin

O‘zbekistonda 2022-yilda energiya resurslari, jumladan, elektr energiyasi, tabiiy gaz, issiq suv va issiqlik energiyasi, sovuq suv va kanalizatsiya tariflarining narxlari indeksatsiya qilinishi mumkin. Bu haqda 2022-yil uchun budjetnoma bo‘yicha Hisob palatasining xulosasida ma’lum qilingan.

Xususan, energiya resurslarining iste’mol narxlari indeksini hisoblash bazasidagi vazni va indeksga ta’siri asosidagi hisob-kitoblarga tayanilsa, mazkur resurslar narxlarining oshishi quyidagicha ko‘rinishda bo‘lishi mumkin:

• elektr energiyasi — 33 foiz;
• tabiiy gaz — 21 foiz;
• issiq suv va issiqlik energiyasi — 20 foiz;
• sovuq suv va kanalizatsiya — 34 foiz.

Ta’kidlanishicha, 2020—2021-yillarda iste’mol narxlari indeksini hisoblash bazasida yuqori vaznni egallovchi energiya resurslari, jumladan, elektr energiyasi va tabiiy gazni ichki iste’molchilarga sotish narxi deyarli o‘zgarmagan. Ushbu resurslarning asosiy yetkazib beruvchilari – davlat ulushidagi “Hududiy elektr tarmoqlari” AJ va “Hududgazta’minot” AJlarining tariflari oshirilmagan.

“Yuqoridagilardan kelib chiqib, energiya resurslari tarif narxlarining 2022-yilda keskin oshirilishi fonida, joriy inflyatsiya darajasining o‘tgan yilga nisbatan pasayishini ta’minlash uchun boshqa iste’mol tovar va xizmatlar narxlari o‘sish sur’atlarini sezilarli darajada pasaytirish talab etiladi”, — deyiladi tavsiya qilingan.

Buning uchun hukumat hamda tarmoq vazirlik va idoralariga iste’mol tarkibidagi yuqori vaznga ega oziq-ovqat (go‘sht, un mahsulotlari, mevasabzavotlar), nooziq-ovqat tovarlari (kiyim-kechak, qurilish mollari) va boshqa xizmatlar (transport va aloqa)ga bo‘lgan talabni to‘laqonli ta’minlash orqali, ular narxlarining barqarorligi ta’minlash choralarini ko‘rish tavsiya etiladi.

Avvalroq O‘zbekistonda 2022-yil aholi jon boshiga YaIM 2,1 ming dollar bo‘lishi rejalashtirilgani, mamlakatda dollar kursi 2022-yilda 11 300 so‘mgacha ko‘tarilishi mumkinligi to‘g‘risida xabar berilgandi.

Eslatib o‘tamiz, 2020-yilning oktabrida Prezident Shavkat Mirziyoyev 2021–2022-yillarda elektr energiyasi tariflarini oshirmaslik bo‘yicha topshiriq bergandi. O‘shanda Shavkat Mirziyoyev “Hududiy elektr tarmoqlari” oldiga asosiy to‘rtta masalani belgilab bergan: birinchidan, boshqaruv tizimini takomillashtirish, ikkinchi — smart tizimi masalasi, uchinchi — billing hamda ERP-tizimi (Enterprise Resource Planning — korxona resurslarini rejalashtirish) masalalari.