AQSh hukumatining COVID-19 pandemiyasiga qarshi kurashish bo‘yicha keng qamrovli global chora-tadbirlari doirasida AQSh Xalqaro taraqqiyot agentligi (USAID) O‘zbekistonga qo‘shimcha 2,5 million dollar ajratdi. Bu haqda AQShning Toshkentdagi elchixonasiga tayanib, “Gazeta.uz” xabar berdi.
Shu tariqa, O‘zbekistonning koronavirusga qarshi kurashdagi sa’y-harakatlarini qo‘llab-quvvatlashga AQSh hukumatining to‘g‘ridan to‘g‘ri qo‘shgan umumiy hissasi 16 million dollardan oshgan.
Ta’kidlanishicha, USAID ushbu qo‘shimcha mablag‘ni dori vositalari sifatini ta’minlash va mamlakatda vaksinaga nisbatan ishonchsizlikni bartaraf etish uchun yuqori darajadagi texnik yordam ko‘rsatishga sarflaydi.
“O‘zbekistonda to‘liq emlanganlar soni asta-sekin o‘sib bormoqda. Ammo pandemiya hali tugamadi — virus butun mamlakat bo‘ylab tarqalishda davom etmoqda va yangi variantlar global miqyosda doimiy xavf tug‘dirmoqda. Pandemiyaga barham berish barchaning xavfsizligini ta’minlash, hayotlarni saqlab qolish va global iqtisodiyotni tiklash uchun juda muhim”, — deydi USAID’ning O‘zbekistondagi missiyasi direktori Mikaela Meredit.
“Vaksinalar bunda asosiy yechim bo‘lib, Bayden ma’muriyati bu harakatga sodiqligini yaqinda Qo‘shma Shtatlarning butun dunyo bo‘ylab 200 million dozadan ortiq COVID-19 vaksinasini xayriya qilganini e’lon qilishi orqali namoyon qildi”, — deya qo‘shimcha qilgan u.
Eslatib o‘tamiz, AQSh hukumati va Xalqaro taraqqiyot agentligi koronavirusga qarshi kurashda O‘zbekistonga yaqindan ko‘mak bermoqda. Xususan, agentlik O‘zbekistonga 2020-yilning fevral, mart va aprel oylarida yordam ko‘rsatdi. AQSh Kasalliklarni nazorat qilish va oldini olish markazi (CDC/CAR) Markaziy Osiyo hukumatlarining COVID-19’ga qarshi sa’y-harakatlarini qo‘llab-quvvatlash maqsadida 6,8 million dollar ajratdi, buning 2,07 million dollari esa O‘zbekistonga berildi. Shuningdek, COVID-19 pandemiyasiga qarshi kurash bo‘yicha kompleks chora-tadbirlar doirasida AQSh hukumati USAID orqali O‘zbekistonga qo‘shimcha 3 million dollar ajratishi ma’lum qilindi. USAID pandemiya vaqtida Markaziy Osiyo mehnat muhojirlari himoyasi uchun 2 million dollar ajratdi, oktabr oyida esa O‘zbekistonga 2,23 million dollarlik tibbiy jihozlar yetkazib berdi.
Izoh (0)