O‘zbekistonda xizmat ko‘rsatgan fan arbobi, O‘zbekiston, Qoraqalpog‘iston va Nyu-York akademiyasining haqiqiy a’zosi, professor Shabat Xo‘jayev 98 yoshida olamdan o‘tdi. Bu haqda Innovatsion rivojlanish vazirligi xabar berdi.
Shabat Xo‘jayev 1924-yilda Toshkent shahrida tug‘ilgan. 1946-yilda Toshkent tibbiyot institutining davolash fakultetini tamomlagan. 1946-yil noyabr oyida Sobiq Ittifoq Tibbiyot fanlari akademiyasining Epidemiologiya, mikrobiologiya va yuqumli kasalliklar institutiga aspiranturaga o‘qishga qabul qilingan (Moskva). Aspiranturani tamomlagach, nomzodlik dissertatsiyasini himoya qilib, 1951-yilgacha shu institutda ishlagan.
1961-yilda Shabat Xo‘jayev Toshkent vrachlar malakasini oshirish institutida yuqumli kasalliklar kafedrasi professori, 1962–1965-yillarda ilmiy-ma’rifiy ishlar bo‘yicha prorektor lavozimlarida ishlagan, 1964-yildan esa bolalar yuqumli kasalliklari kafedrasini tashkil etib, 40 yil davomida unga rahbarlik qilgan.
Shabat Xo‘jayev 1967-yilda O‘rta Osiyoda ilk bor 1-klinik yuqumli kasalliklar shifoxonasida virusologiya laboratoriyasini yaratgan va O‘zbekistonda birinchi marta gripp va boshqa o‘tkir respirator kasalliklar diagnostikasi uchun immunofluoressensiya reaksiyasini joriy qilgan. Klinik immunologiyada olib borilgan ishlarning katta bosqichi natijasi o‘laroq Moskvada nashr etilgan “Immunologiya bo‘yicha qo‘llanma” (1973) monografiyasi bo‘ldi.
1979-yilda Shabat Xo‘jayev D.I.Ivanovskiy nomidagi Virusologiya institutining O‘zbekistondagi filialini tuzib, unga rahbarlik qilgan. O‘zbekiston Sog‘liqni saqlash vazirligi Virusologiya institutiga asos solib, unga 2004-yilgacha rahbarlik qilgan.
Professor Xo‘jayev virusli gepatit sohasida ish boshlagan holda O‘zbekiston aholisini gepatit virusiga qarshi ommaviy emlash g‘oyasini ilgari surib, buni bosqichma-bosqich amalga oshirgan. 1990–1991-yillarda Shabat Xo‘jayev rahbarligida Virusologiya ilmiy-tadqiqot institutida virusli gepatit B ga qarshi emlash dasturi ishlab chiqilgan.
Bundan avval akademik Nusrat Parpiyev 90 yoshida, professor Temurjon Otaqo‘ziyev 85 yoshida, akademik O‘tkir Rasulyev 82 yoshida vafot etgani to‘g‘risida xabar berilgandi.
Izoh (0)