Bloger Aqida Hanum Facebook ijtimoiy tarmog‘ida Mirsaid Haydarov ismli, “Mufasa” nomi ostida faoliyat yuritadigan bloger sovchilarini qaytarib, unga turmushga chiqishga rozi bo‘lmagan jurnalist D.I.ning yuziga kislota sepib yuborish bilan tahdid qilganini aytib, post qoldirdi.
Aqida Hanumning yozishicha, “men DXXga ishlayman, respublikada akaxonlarim bor, oyiga 10 million (so‘m) olaman” deydigan yigit sovchilarini qaytargan qizga tahdid qilgan. Qiz IIBga ikki marta murojaat qilgan, ammo hech qanday chora ko‘rilmagan.
“Kuyovimiz Mufasa degan bloger ekan. Qizimiz jurnalist”, deya yozgan Aqida Hanum post ostida yigit va qiz o‘rtasida bo‘lib o‘tgani aytilgan telefon yozishmalarini qoldirgan. Unda Mirsaid Haydarov ekani nazarda tutilgan yigit yuzi kuyib ketgan qiz aks etgan rasmni ilova qilib, “baklajkasi 25 ming (so‘m)” bo‘lgan kislotadan olib qo‘yganini aytgan. “Menga erga tegmasliging aniq bo‘ldi. Endi biror nima qilsam, afsuslanmayman”, — deya tahdid qilgan u.
Ichki ishlar vazirligi matbuot kotibi Shohruh G‘iyosov holatga munosabat bildirib, vaziyat Toshkent shahar IIBB xotin-qizlar masalalari bo‘limi tomonidan nazoratga olingani, hozirda tergovga qadar tekshiruv harakatlari amalga oshirilayotganini ma’lum qildi. “Holat to‘liq o‘rganilib, vaziyatga huquqiy baho beriladi hamda jamoatchilikka qo‘shimcha ravishda ma’lumot taqdim etiladi”, deyiladi xabarda.
Mavzuga doir:
- Toshkentda 15 yoshli qiz bilan jinsiy yaqinlik qilgan jismoniy tarbiya o‘qituvchisi va uning sheriklariga sud hukmi o‘qildi
- Toshkentda talaba qizga tegajog‘lik qilib, uni oynadan itarib yuborishda gumonlangan dekan o‘rinbosari qo‘lga olindi
- Toshkentda 63 yoshli ayolga nevarasi tengi yigit shilqimlik qilib, kaltaklagani aytilmoqda
Izoh (0)