Foto: Prezident topshirig‘iga ko‘ra daraxt ekayotgan farg‘onalik hokimlar

Prezident Shavkat Mirziyoyev raisligida 2-noyabr kuni aholini uy-joy bilan ta’minlash hamda yashil maydonlarni kengaytirish chora-tadbirlari muhokamasi yuzasidan videoselektor yig‘ilishi o‘tkazilgandi. Yig‘ilishda davlat rahbari yiliga 200 mln tup daraxt va buta ko‘chatlarini ekish va shu orqali shaharlardagi yashil maydonlarni amaldagi 8 foizdan 30 foizga oshirish rejalashtirilganini ma’lum qilgan.

Shuningdek, bundan buyon ekologiya, daraxt ekish va parvarishlash masalalariga shahar hokimining qurilish bo‘yicha o‘rinbosari mas’ul bo‘lishi ta’kidlanib, 10-dekabrga qadar daraxt ekish bo‘yicha “Dolzarb 40 kunlik” e’lon qilingan. O‘rmon xo‘jaligi davlat qo‘mitasiga hokimlar bilan birga, har bir hududning iqlim sharoitiga mos ko‘chatlarni ko‘paytirish va yetkazib berish vazifasi qo‘yilgan edi.

Yig‘ilishda, shuningdek, Jizzax, Qashqadaryo, Samarqand, Surxondaryo, Toshkent viloyatida 16 million tupdan, Andijon, Buxoro, Namangan, Farg‘onada 15 million tupdan, Qoraqalpog‘iston, Navoiy, Sirdaryo, Xorazmda esa 14 million tupdan ko‘chat ekilishi aytilgan.

Shundan so‘ng, Ekologiya va atrof-muhitni muhofaza qilish qo‘mitasi “Dolzarb 40 kunlik” doirasida O‘zbekiston viloyatlarida qaysi turdagi daraxtlar ekilishi bo‘yicha ma’lumot bergan. Qo‘mita ma’lumotiga ko‘ra, mutaxassislar tomonidan O‘zbekiston hududlarida ekish uchun kashtan, oqqayin, eman, yapon saforasi, shumtol, qayrag‘och, pavloniya, terak, akatsiya, chinor, tut, jiyda, yong‘oq, behi, uzum, qrim qarag‘ayi va virgin archasi kabi 27 turdagi daraxt ko‘chatlari taklif etilgan.

9-noyabr kuni prezident Shavkat Mirziyoyev raisligida o‘tkazilgan videoselektor yig‘ilishida “Yashil makon” umummilliy loyihasini amalga oshirish bo‘yicha masalalar ham ko‘rib chiqilgan.

Yig‘ilishda Shavkat Mirziyoyev “Yashil makon” dasturi bo‘yicha ko‘chat ekish ishlari haligacha boshlanmagani uchun 12 ta tuman hokimi – Qo‘shrabot, Kattaqo‘rg‘on, Tomdi, Do‘stlik, Arnasoy, Forish, Yangiariq, Sherobod, Termiz, Muzrabot, G‘uzor, Kitob tumanlari hokimlari qat’iy ogohlantirilganini ma’lum qilgan.

Daraxt ekish bo‘yicha “Dolzarb 40 kunlik” e’lon qilinishi munosabati bilan “Daryo” Farg‘ona viloyatidagi shahar-tumanlar hokimlari tomonidan qanday ko‘chatlar ekilgani haqida ma’lumot to‘pladi.

Qo‘qon shahar hokimi Ma’rufjon Usmonov

Qo‘qon hokimi Ma’rufjon Usmonov 3-noyabr kuni shaharning Turkiston ko‘chasi va Furqat bog‘ida o‘tkazilgan ommaviy ko‘kalamzorlashtirish tadbirida kashtan va lola daraxtlarini ekkan.

Ma’lum qilinishicha, Qo‘qon shahrida kuz va bahor mavsumlarida kashtan, lola, lipa, oqqayin, eman, yapon saforasi, shumtol, qayrag‘och, pavlovniya, terak, zarang kabi 1 million tupdan ziyod daraxt ekilishi rejalashtirilgan. Bugunga qadar 32 ming tup ko‘chat ekilgan.

Ta’kidlanishicha, Qo‘qon shahrida 3 ming yildan ziyod umr ko‘radigan sekvoya ko‘chatlari ham ekiladi. Buning uchun O‘rda maydonida maxsus yer maydoni ajratiladi. Sekvoya ko‘chatlarini keltirishga hissa qo‘shganlarning ismi daraxtlarga yozib qo‘yiladi.

Marg‘ilon shahar hokimi Adhamjon Ziyavitdinov

Marg‘ilon hokimi Adhamjon Ziyavitdinov 4-noyabr kuni shahar markazidagi Davlat soliq inspeksiyasi binosi oldidagi maydonda kashtan va virgin archasini ekkan.

Mahalla va oilani qo‘llab-quvvatlash bo‘limining ma’lum qilishicha, shaharda kashtan, oqqayin, eman, yapon saforasi, shumtol, qayrag‘och, pavloniya kabi 750 ming tupdan ortiq daraxt ekilishi rejalashtirilgan. Shu kungacha 31 ming tupdan ortiq daraxt ko‘chatlari ekilgan.

O‘zbekiston tumani hokimi Sherzodjon Yuldashev

O‘zbekiston tumani hokimi Sherzodjon Yuldashev 3-noyabr kuni “Kichik Oqmachit” mahallasida yo‘l bo‘yi va aholi xonadonlarida virgin archasi hamda mevali daraxt ko‘chatlarini ekkan.

Tuman hokimligi axborot xizmatining ma’lum qilishicha, “Yashil makon” umummilliy loyihasi doirasida joriy yil kuz-qish mavsumida 236 ming tup, 2022-yilning bahor oylarida esa 394 ming tupdan ziyod manzarali va mevali daraxt ko‘chatlari ekilishi rejalashtirilgan. Ayni vaqtga qadar 34 ming tupdan ziyod ko‘chatlar ekilgan.

Dang‘ara tumani hokimi Shuhratjon Tojihakimov

Dang‘ara hokimi Shuhratjon Tojihakimov 5-noyabr kuni tuman markazidagi Sanoat ko‘chasida yapon saforasi va pavloniya daraxtlarini ekkan.

Tuman hokimligi axborot xizmatining ma’lum qilishicha, “Yashil makon” umummilliy loyihasi doirasida 663 ming tup ko‘chat ekilishi rejalashtirilgan. Shu kunga qadar 32 ming tupdan ortiq pavloniya, kashtan, virgin archasi, tut kabi daraxt ko‘chatlari ekilgan.

Quva tumani hokimi Halimjon Umarov

Quva tumani hokimi Halimjon Umarov 3-noyabr kuni Ahmad Farg‘oniy majmuasida mushmula va virgin archasi ekkan.

Ma’lum qilinishicha, Quva tumanida har yili o‘rtacha 50 milliondan ortiq manzarali va mevali daraxt ko‘chatlari yetishtiriladi. Joriy yil kuz va 2022-yil bahor oylarida tumanda 1 million tup mevali hamda manzarali ko‘chatlar ekilishi rejalashtirilgan. Bugungi kunga qadar 200 ming tupga yaqin ko‘chat ekilgan.

So‘x tumani hokimi Sayidbahrom Sayidmusayev

So‘x hokimi Sayidbahrom Sayidmusayev 6-noyabr kuni tuman tibbiyot birlashmasi hududida “yashil makon” tashkil etish ishlarida qatnashgan. Tuman hokimi obodonlashtirish boshqarmasi xodimlari bilan virgin archalarini ekkan.

Tuman hokimligi axborot xizmatining ma’lum qilishicha, “Yashil makon” umummilliy loyihasi doirasida joriy yil kuz mavsumida 220 ming tup, 2022-yilning bahor oylarida esa 400 ming tupdan ziyod manzarali va mevali daraxt ko‘chatlari ekilishi rejalashtirilgan. Ayni vaqtga qadar 31 ming tupdan ziyod ko‘chatlar ekilgan.

Uchko‘prik tumani hokimi Akmaljon Mahmudaliyev

Uchko‘prik tumani hokimi Akmaljon Mahmudaliyev 3-noyabr kuni “Farovon” mahallasida pavloniya va virgin archalarini ekkan.

Mahalla va oilani qo‘llab-quvvatlash bo‘limining ma’lum qilishicha, “Yashil makon” umummilliy loyihasi doirasida tumanda joriy yil kuz-qish mavsumida 191 ming tupdan ziyod, 2022-yilning bahor mavsumida esa 220 ming tupdan ziyod manzarali va mevali daraxtlar ekilishi rejalashtirilgan. Bugunga qadar 34 ming tupdan ziyod daraxt ekilgan.

Qo‘shtepa tumani hokimi Ilyos Navikov

Qo‘shtepa hokimi Ilyos Navikov 4-noyabr kuni tuman markazidagi Baxmal ko‘chasida virgin archasi va mevali daraxtlar ekkan.

Mahalla va oilani qo‘llab-quvvatlash bo‘limining ma’lum qilishicha, tumanda kashtan, oqqayin, eman, yapon saforasi, qayrag‘och, pavloniya tut kabi 636 ming tupdan ortiq daraxt ekilishi rejalashtirilgan. Shu kungacha 41 ming tupdan ortiq daraxt ko‘chatlari ekilgan.

Farg‘ona tumani hokimi Shuhratjon Mo‘minov

Farg‘ona tumani hokimi Shuhratjon Mo‘minov 10-noyabr kuni bodom ko‘chati ekkan. Tumanda daraxt ekish bo‘yicha “Dolzarb 40 kunlik”da 945 ming tup mevali va manzarali daraxt ekilishi rejalashtirilib, ayni vaqtga qadar 41 ming tup ko‘chat ekib bo‘lingan.

Yozyovon tumani hokimi Dilshodjon Jalilov

Yozyovon tumani hokimi Dilshodjon Jalilov 4-noyabr kuni Davlat soliq inspeksiyasi binosi oldidagi maydonda virgin archasi va pavloniya daraxti ekkan.

Oltiariq tumani hokimi Xolmirza Niyozov

Oltiariq hokimi Xolmirza Niyozov 3-noyabr kuni tuman markazidagi O‘zbekiston ko‘chasida virgin archasi va yapon saforasi ekkan.

Tumanda daraxt ekish bo‘yicha “Dolzarb 40 kunlik”da 723 ming tup ko‘chat ekilishi rejalashtirilib, ayni vaqtga qadar 31 ming tupi ekib bo‘lingan.

Furqat tumani hokimi Jahongir Jumanov

Furqat hokimi Jahongir Jumanov 5-noyabr kuni tuman markazidagi kichik xiyobonda virgin archasini ekkan.

Ma’lumot uchun, Farg‘ona viloyatida 2021-yil kuz va 2022-yil bahor mavsumida 15 million 291 ming dona mevali va manzarali ko‘chatlar ekilishi rejalashtirilgan.