Sirdaryoda farzandlarining aliment pulini to‘lamagan ayolga nisbatan chora ko‘rildi

Majburiy ijro byurosi Sirdaryo viloyati Guliston shahar bo‘limi ish yurituviga noodatiy aliment undiruvi bilan bog‘liq ijro hujjati kelib tushib, ijro harakatlari olib borildi. Bu haqda byuro matbuot xizmati “Daryo”ga ma’lum qildi.

Ma’lum qilinishicha, A.Ashurova (ismi sharifi shartli o‘zgartirilgan) oilasidan voz kechib, ikki nafar norasida go‘daklarini turmush o‘rtog‘iga tashlab ketgan.

A.Ashurovaning turmush o‘rtog‘i bolalarni o‘z tarbiyasiga olib, uni moddiy ta’minot bilan ta’minlashda qiynalgani sababli fuqarolik ishlari bo‘yicha Guliston tumanlararo sudiga bolalarning onasidan aliment undirib berishini so‘rab qilgan murojaati qanoatlantirilgan.

Mazkur sudning 2018-yil 20-sentabrdagi aliment undirish to‘g‘risidagi ijro hujjati bo‘yicha Byuroning Guliston shahar bo‘limi davlat ijrochilari tomonidan ijro harakatlari olib borilib, voyaga yetmagan farzandlari Murodjon hamda Marjonaning moddiy ta’minlashdan bo‘yin tovlagan ona bilan bir necha bor tushuntirish-targ‘ibot ishlari olib borilgan va rasman ogohlantirgan bo‘lsa-da, 27 oydan ortiq muddat mobaynida 13 029 571 so‘mlik aliment pullarini to‘lashdan qasddan bosh tortib kelgan.

Shu sababli 2020-yil 19-noyabrda Guliston shahar ma’muriy sudi tomonidan Ma’muriy javobgarlik to‘g‘risidagi kodeksning 47–4-moddasida (voyaga yetmagan yoki mehnatga layoqatsiz shaxslarni moddiy ta’minlashdan bo‘yin tovlash) nazarda tutilgan huquqbuzarlikni sodir qilgan deb topilib, qarzdor A.Ashurovaga 5 sutka ma’muriy qamoq jazosi tayinlangan.

Lekin shunga qaramasdan, qarzdor A.Ashurova o‘ziga tegishli xulosa chiqarib olmasdan, 2020-yil noyabr oyidan 2021-yil avgust oyiga qadar, ya’ni 9 oy davomida 2 346 907 so‘mlik aliment pullarini to‘lashdan qasddan bo‘yin tovlab kelgan.

Byuroning Guliston shahar bo‘limi davlat ijrochisining 2021-yil 1-avgustdagi “aliment qarzini hisoblash to‘g‘risida”gi qaroriga ko‘ra, qarzdor A.Ashurovaning alimentdan bo‘lgan qarzi jami 36 oy davomida 15 376 477 so‘mni tashkil qilgan.

Mazkur jinoyat ishi yuzasidan 2021-yil 18-avgust kuni qarzdor A.Ashurovaga nisbatan Jinoyat kodeksining 122-moddasi 1-qismi (voyaga yetmagan yoki mehnatga layoqatsiz shaxslarni moddiy ta’minlashdan bo‘yin tovlash) bilan ayblanuvchi tariqasida ishda ishtirok etishga jalb qilingan.

Ushbu jinoyat ishi yuzasidan ayblov dalolatnomasi tuzilib, mazmunan ko‘rish uchun jinoyat ishlari bo‘yicha Guliston shahar sudiga yuborilgan.

JIB Guliston shahar sudining 2021-yil 6-oktabr kunidagi hukmi bilan A.Ashurova Jinoyat kodeksining 122-moddasi 1-qismi bilan aybli topilib, 15 376 477 so‘mni to‘liq to‘lab berishlik majburiyati bilan 6 oy muddatga ozodlikdan cheklash jazosi tayinlangan.