O‘zbekistondagi chang konsentratsiyasi eng yuqori bo‘lgan hududlar ma’lum qilindi

O‘zbekiston Gidrometeorologiya xizmati markazi 4-noyabr kuni kuzatilgan chang-g‘ubor ta’sirida atmosferaning chang bilan ifloslanishi eng yuqori bo‘lgan hududlarni ma’lum qildi.

4-noyabr kuni havoda chang miqdori bo‘yicha maksimal ahamiyatlilik: Guliston, Olmaliq shahrida 20 REM (ruxsat etilgan miqdor), Chirchiq — 26, Toshkent — 33, Bekobod — 18, Angren — 8, Buxoro shahri — 14, Navoiy shahri — 8, Samarqand — 4, Sariosiyo, Namangan, Urganch, Farg‘ona, Qo‘qonda taxminan 2 REM.

Ma’lum qilinishicha, 5 va 6-noyabr kunduzi atmosfera havosining chang bilan ifloslanishi pasaya boshlagan va 2 dan 8 REM darajasi yetgan.

8-noyabr kunduzi respublikada atmosfera havosi ifloslanishi faqat ayrim shaharlarda ruxsat etilgan ahamiyatlilikdan yuqori bo‘lgan: Bekobod — 2,7 REM, Farg‘ona va Qo‘qon — 2, Samarqand — 1,5, Guliston, Chirchiq va Olmaliq — 1,3, Buxoro, Angren va Sariosiyo — 1,1, Navoiy va Urganch — 0,9 va Nukus — 0,7 REM.

Ta’kidlanishicha, Toshkentdagi atmosfera havosining ifloslanishini kuzatish avtomatik monitoring stansiyalarida har soatda amalga oshiriladi. Boshqa shaharlarda kuzatuvlar diskret rejimida o‘tkaziladi.

Eslatib o‘tamiz, 4-noyabr kuni O‘zbekiston hududiga Ural tomondan sovuq havo oqimi kirib kelgan. Sovuq havo fronti zonasida shamol tezligi 12-15 metr/soniyaga qadar kuchaydi, Buxoro, Navoiy, Jizzax viloyatlarida esa soniyasiga 20-25 metrga qadar yetdi. Shu kuni Toshkentda chang miqdori ruxsat etilgan me’yordan 5 barobarga, keyinroq mahalliy vaqt bilan soat 21:00 va 23:00 orasida 30 barobargacha ko‘tarilgandi va poytaxt havoning ifloslanish darajasi bo‘yicha dunyoda birinchi o‘ringa chiqdi. 6-noyabr kunduzi havoning isishi atmosferada chang tarkibi sezilarsiz kamayishiga olib keldi, ammo changli g‘ubor butunlay tarqalmadi. 7-noyabr kuni esa havoning ifloslanish darajasi avvalgi kunga nisbatan pasaya boshladi. 8-noyabr kuni Toshkent havosidagi chang miqdori normal ko‘rsatkichga qaytgan.