O‘zbekiston prezidenti Shavkat Mirziyoyev inauguratsiya marosimida so‘zlagan nutqida xalq deputatlari kengashlari va hokimlar vakolatlarini aniqlashtirish bo‘yicha rejalar haqida gapirdi, deb xabar berdi “Gazeta.uz”.
Shavkat Mirziyoyev xalq deputatlari kengashlari va hokimlarning vakolatlarini aniq belgilashga oid qonuniy asoslarni yaratish vaqti kelganini ta’kidladi.
“Necha marta biz buni gapiryapmiz, lekin mana, besh yil tajriba orttirdik… Endi kengashning rahbari ijro organi rahbari bo‘lishi mumkin emasligini xalqimizning o‘zi aytyapti. Vaqt-soati keldi, qonuniy masalani ham joy-joyiga qo‘yamiz. Shunday qilib, demokratik yo‘nalishlardagi katta poydevorni yaratamiz. Agar shu poydevor bo‘lsa, anchagina ijro organi rahbarlari ham xalq tomonidan jilovlanadi. Xalq deganim — deputatlar tomonidan, deputatlar deganim — xalq saylagan vakillar tomonidan”, — dedi u.
Bundan tashqari, fuqarolik jamiyati institutlarining erkin faoliyat yuritishi, davlat va jamiyat boshqaruvida faol ishtirok etishi uchun zarur shart-sharoitlar yaratish ko‘zda tutilgan. Shu maqsadda Jamoatchilik palatasini tashkil etish bo‘yicha ishlarni jadallashtirish rejalashtirilgan.
Shavkat Mirziyoyev hokimlarni lavozimga saylashni birinchi bor 2016-yilning dekabrida taklif etgan edi. 2017-yilning avgustida u hoziroq hokimlarni xalq saylashi tizimini joriy etishga tayyorligini bildirgandi.
2020-yilning sentabr oyida davlat rahbari yana bir bor “Hokimlarni xalq saylashi kerak. Shu kunlarga baribir kelamiz”, deb ta’kidlagandi. Bundan tashqari, 2021-yil 18-iyun kuni ham “Baribir hokimlarni xalq saylaydi, qanday og‘ir bo‘lmasin, shu kunga kelamiz” degandi.
Hozirda viloyatlar va Toshkent shahar hokimlari tegishli xalq deputatlari kengashi tomonidan tasdiqlangandan keyin Prezident tomonidan lavozimga tayinlanadi va lavozimdan ozod qilinadi. Shu bilan birga, nomzodni davlat rahbari tavsiya etadi.
Deputat Rasul Kusherbayev xalq hokimlarni saylashga tayyor emasligi haqidagi fikrga qo‘shilmasligini ma’lum qilgan edi. Uning so‘zlariga ko‘ra, “ruxsat berayotganlarning o‘zi tayyor emas”. “Ularda qo‘rquv bo‘lishi mumkin. Qaysi ma’noda, ular xohlagan odamni odamlar saylamasligi mumkin”, — degan u.
Izoh (0)