“Baribir hokimlarni xalq saylaydi, qanday og‘ir bo‘lmasin, shu kunga kelamiz” — Shavkat Mirziyoyev

Prezident Shavkat Mirziyoyev Andijon viloyati faollari bilan uchrashuvda kelajakda hokimlarning saylanishiga to‘xtalib o‘tdi, deb xabar bermoqda “Gazeta.uz”.

Davlat rahbari har bir viloyat, tuman va shaharda vazirlik va respublika idoralarining vakillari borligini, lekin ular haligacha quyi pog‘onaga hisobot berishni o‘rganmaganligini ta’kidlagan. “Bizning ijro organimizdagi eng katta kamchilik shu. Bu organlar vakillari yuqori tashkilotiga suyanib, o‘z bilganicha ishlab yuribdi. Bu zamon tugagan”, — dedi u.

“Baribir viloyat, tuman, shahar hokimlarini xalq saylaydi, qanday og‘ir bo‘lmasin, shu kunga kelamiz. Xalq joylardagi hokimiyat vakillaridan hisobot talab qilsa, vaziyat o‘zgaradi”, — degan Shavkat Mirziyoyev.

Mart oyida Prezident Toshkent viloyatida bo‘lib o‘tgan xalq deputatlari kengashi yig‘ilishida ham ushbu masalaga to‘xtalgan edi. “Hokimlar ham saylansin, degan gaplar ham juda ko‘p aytilyapti. Buni men o‘zim ham aytganman. Lekin bir savol bor: hokimlarni saylashga biz hozir tayyormizmi? Biz bitta mahalla raisini ham adolatli saylay olmaymiz-ku. Men buni xohlamaymanmi? Juda ham xohlayman, men ham buni yaxshi tushunaman. Lekin kimni saylaymiz?”, — deb ta’kidlagandi davlat rahbari.

Shavkat Mirziyoyev hokimlarni lavozimga saylashni birinchi bor 2016-yilning dekabrida taklif etgan edi. 2017-yilning avgustida u hoziroq hokimlarni xalq saylashi tizimini joriy etishga tayyorligini bildirgandi.

2020-yilning sentabr oyida davlat rahbari yana bir bor “Hokimlarni xalq saylashi kerak. Shu kunlarga baribir kelamiz”, deb ta’kidlagandi.

Hozirda viloyatlar va Toshkent shahar hokimlari tegishli xalq deputatlari kengashi tomonidan tasdiqlangandan keyin Prezident tomonidan lavozimga tayinlanadi va lavozimdan ozod qilinadi. Shu bilan birga, nomzodni davlat rahbari tavsiya etadi.

Deputat Rasul Kusherbayev xalq hokimlarni saylashga tayyor emasligi haqidagi fikrga qo‘shilmasligini ma’lum qilgan edi. Uning so‘zlariga ko‘ra, “ruxsat berayotganlarning o‘zi tayyor emas”. “Ularda qo‘rquv bo‘lishi mumkin. Qaysi ma’noda, ular xohlagan odamni odamlar saylamasligi mumkin”, — degan u.