O‘zbekistonda dam olish kunlari havo harorati ko‘tariladi

O‘zbekistonning barcha hududlarida 5-noyabr, juma kuni quruq, shamolsiz va sovuq ob-havo bo‘lishi kutilmoqda, deb xabar bermoqda “O‘zgidromet”.

Qayd etilishicha, respublika bo‘yicha ba’zi joylarda changli g‘ubor bo‘ladi. Havo harorati 3-8 daraja iliqdan ko‘tarilmaydi. Bu oy boshi uchun bo‘lgan me’yoriy qiymatlardan 12-15 darajaga past bo‘lib, bunga kecha Ural hududlaridan mamlakatga kirib kelgan sovuq antisiklon sababchidir.

Dam olish kunlari sovuq antisiklonning ta’siri asta-sekin kuchsizlashadi, yog‘ingarchilik kutilmaydi, havo harorati asta-sekin ko‘tariladi.

6-noyabr, shanba kuni havo harorati kechasi 3 daraja sovuq-2 daraja iliqni, kunduz kuni 6-11 daraja iliqni tashkil etadi. Yakshanba kuni kechasi 0-5 daraja iliqqacha, ba’zi joylarda esa 2 daraja sovuqqacha bo‘lishi mumkin. Kunduz kuni 9-14 daraja iliqqacha isiydi.

Eslatib o‘tamiz, 4-noyabr kuni tuproqning quruq ustki qatlamlarini shamol ko‘targani tufayli Toshkent shahri va boshqa viloyatlarda chang-qum aralash tuman yuzaga keldi. Poytaxt havosidagi chang miqdori me’yordan 5 barobar oshib ketdi va nafas olishda muammolar yuzaga kelgan aholi tibbiyot muassasalariga murojaat qila boshladi. Sog‘liqni saqlash vazirligi fuqarolarga chang bo‘ronida ko‘chaga kamroq chiqish va niqob taqishni tavsiya qildi.

Chang bo‘roni, shuningdek, poytaxt aholisining asosiy qismini ichimlik suvi bilan ta’minlovchi “Qodiriya” bosh suv inshootida yuqori kuchlanishli elektr ta’minotida nosozlik yuzaga kelishiga, oqibatda Toshkentning katta qismi ichimlik suvisiz qolishiga ham sabab bo‘ldi.