Ўзбекистоннинг барча ҳудудларида 5 ноябрь, жума куни қуруқ, шамолсиз ва совуқ об-ҳаво бўлиши кутилмоқда, деб хабар бермоқда «Ўзгидромет».
Қайд этилишича, республика бўйича баъзи жойларда чангли ғубор бўлади. Ҳаво ҳарорати 3-8 даража илиқдан кўтарилмайди. Бу ой боши учун бўлган меъёрий қийматлардан 12-15 даражага паст бўлиб, бунга кеча Урал ҳудудларидан мамлакатга кириб келган совуқ антициклон сабабчидир.
Дам олиш кунлари совуқ антициклоннинг таъсири аста-секин кучсизлашади, ёғингарчилик кутилмайди, ҳаво ҳарорати аста-секин кўтарилади.
6 ноябрь, шанба куни ҳаво ҳарорати кечаси 3 даража совуқ-2 даража илиқни, кундуз куни 6-11 даража илиқни ташкил этади. Якшанба куни кечаси 0-5 даража илиққача, баъзи жойларда эса 2 даража совуққача бўлиши мумкин. Кундуз куни 9-14 даража илиққача исийди.
Эслатиб ўтамиз, 4 ноябрь куни тупроқнинг қуруқ устки қатламларини шамол кўтаргани туфайли Тошкент шаҳри ва бошқа вилоятларда чанг-қум аралаш туман юзага келди. Пойтахт ҳавосидаги чанг миқдори меъёрдан 5 баробар ошиб кетди ва нафас олишда муаммолар юзага келган аҳоли тиббиёт муассасаларига мурожаат қила бошлади. Соғлиқни сақлаш вазирлиги фуқароларга чанг бўронида кўчага камроқ чиқиш ва ниқоб тақишни тавсия қилди.
Чанг бўрони, шунингдек, пойтахт аҳолисининг асосий қисмини ичимлик суви билан таъминловчи «Қодирия» бош сув иншоотида юқори кучланишли электр таъминотида носозлик юзага келишига, оқибатда Тошкентнинг катта қисми ичимлик сувисиз қолишига ҳам сабаб бўлди.
Изоҳ (0)