4-noyabr kuni O‘zbekiston bo‘ylab esgan changli shamol va qumbo‘roni oqibatida Buxoro viloyati Peshku tumani hokimligi binosining tomi uchib ketdi. Tuman hokimi Vahobjon Qahhorovning “Daryo”ga xabar berishicha, shift hokimlik binosidan 20 metrcha naridagi yo‘l yoqasiga borib tushgan.

Foto: “Daryo”

“Chamasi, soat 17:00 lar edi. Ish ayni avjida, hokimlik binosiga o‘z tashvish, muammolari bilan ayni odamlar kelishayotgan payt. Ertalabdan to‘ziyotgan shamol kutilmaganda kuchli qumbo‘ronga aylandi. Hokimlik binosi tom qismida vahimali ko‘chish sodir bo‘ldi. Yaxshiyam, odamlar sergak va hushyor. Hech kimga jismoniy ziyon yetmadi”, — deydi tuman hokimi.

Vahobjon Qahhorovning so‘zlariga ko‘ra, tuman hokimligi binosi oldidagi usti yopiq aholi dam olish o‘rindiqlariga ham jiddiy shikast yetgan. Yoritgichlar sinib, binoga elektr energiyasi yetkazib beruvchi barcha simlar ishdan chiqqan. Shuningdek, tuman soliq idorasi binosi shifti ham qumbo‘ronda qo‘porilib ko‘chib tushgan. Bir nechta aholi yashash uylarining shiftlari ko‘chgan, ko‘ngilsiz oqibatlardan ehtiyotlanish uchun qator manzillarni elektr energiyasidan uzib qo‘yishga to‘g‘ri kelgan.

Tuman hokimining ta’kidlashicha, hokimlik vakiliga tegishli Nexia avtomashinasi uchib tushgan tom ostida qolgan va jiddiy shikastlangan.

Foto: “Daryo”

“Tabiiy ofat tufayli tumandagi inshootlarga, aholi turar joy binolari shiftlariga talafot yetdi. Holat haqidagi xabarni eshitiboq, viloyat hokimi, Favqulodda vaziyatlar boshqarmasi boshlig‘i va sektor rahbarlari zudlik bilan yetib keldi. Tez kunda talafot oqibatlari bartaraf etiladigan bo‘ldi”, — deydi Qahhorov.

Ma’lum bo‘lishicha, mazkur binolar shiftlari bundan 7-8 yil ilgari sifatli qurilish materiallaridan mustahkam o‘rnatilgan. 2019-yilda Buxoroda esgan kuchli shamolga dosh bergan.

Foto: “Daryo”

Eslatib o‘tamiz 4-noyabr kuni tuproqning quruq ustki qatlamlarini shamol ko‘targani tufayli Toshkent shahri va boshqa viloyatlarda chang–qum aralash tuman yuzaga keldi. Poytaxt havosidagi chang miqdori me’yordan 5 barobar oshib ketdi. Shu bilan birga, havo harorati noldan pastga tushdi.