Prezidentlikka saylangan Shavkat Mirziyoyevning inauguratsiya marosimi 6-noyabr kuni bo‘lib o‘tishi rasman ma’lum qilindi.
Oliy Majlis Qonunchilik palatasining xabar berishicha, Oliy Majlis Qonunchilik palatasi va Senatning O‘zbekiston Respublikasi saylangan Prezidentining lavozimiga kirishishiga bag‘ishlangan qo‘shma majlisi 6-noyabr kuni soat 11:00 da Toshkent shahrida Oliy Majlis Senatining yangi binosi katta majlislar zalida bo‘lib o‘tadi.
Eslatib o‘tamiz, 29-oktabr kuni Markaziy saylov komissiyasi Shavkat Mirziyoyevni keyingi besh yilga O‘zbekiston Prezidenti lavozimiga saylangan deb hisoblash to‘g‘risida qaror qabul qilgandi. Saylov kodeksiga ko‘ra, O‘zbekiston Prezidenti Markaziy saylov komissiyasi tomonidan Prezident saylovi natijalari rasmiy ravishda e’lon qilingan kundan e’tiboran kechi bilan ikki oy ichida Oliy Majlis palatalarining qo‘shma majlisida qasamyod qilgan paytdan e’tiboran o‘z lavozimiga kirishadi.
O‘zbekiston Senatining Islom Karimov shohko‘chasi, 9-uy manzilida (Tashqi ishlar vazirligining sobiq bosh qarorgohi o‘rnida) joylashgan yangi binosi oldida keng ko‘lamli obodonlashtirish va ta’mirlash ishlari olib borildi.
Senatning eski binosi Mustaqillik maydonida joylashgan edi. 2018-yil yozida Tashqi ishlar vazirligi Xalq bankining eski (sobiq Toshkent hokimligi) binosiga ko‘chib, TIV binosiga esa Senat ko‘chib o‘tishi ma’lum bo‘lgan edi.
Biroq oradan ko‘p o‘tmay, Senat apparati xodimlari va senatorlar Mustaqillik maydonidagi o‘z binosiga qaytgandi. Bunga sabab sifatida TIVning sobiq binosi jiddiy ta’mirga muhtojligi, u yerda Senatning “normal ishlashi va tadbirlarni o‘tkazishi uchun sharoit yo‘q”ligi ko‘rsatilgandi.
2021-yil boshida ta’mirlanayotgan binoni prezident Shavkat Mirziyoyev ko‘zdan kechirgandi. O‘shanda Oliy Majlis palatalarining qo‘shma majlisini o‘tkazish uchun 280 o‘rinli zal tashkil etilayotgani, u milliy naqshlar bilan bezatilib, zamonaviy texnikalar bilan jihozlanayotgani ma’lum qilingan edi.
Izoh (0)