BMTning iqlim sammitida 40 dan ortiq davlat ko‘mirdan foydalanishni kamaytirish to‘g‘risida shartnoma imzoladi

Birlashgan Millatlar Tashkilotining iqlim bo‘yicha konferensiyasi (COP26) davomida 40 dan ortiq mamlakatlar yangi ko‘mir elektrostansiyalarini moliyalashtirishni to‘xtatish to‘g‘risidagi deklaratsiyani imzoladi. Shuningdek, shartnomada mavjud stansiyalarni — rivojlangan mamlakatlarda 2030-yillarda, rivojlanayotgan mamlakatlarda esa 2040-yillarda yopish ko‘zda tutilgan.

Shartnomaga imzo chekkan davlatlar qatorida Polsha, Vyetnam, Indoneziya, Chili kabi yirik ko‘mir iste’molchilari ham bor. Shu bilan birga, konferensiya veb-saytidagi ma’lumotlarga ko‘ra, eng yirik ko‘mir iste’molchilari — Xitoy, AQSh, Hindiston, Avstraliya hali xalqaro bitimda ishtirok etmayapti.

Bitim karbonat angidridni ushlab qoluvchi texnologiyalardan foydalanmaydigan ko‘mirda ishlaydigan elektrostansiyalarga taalluqli. Konferensiyaga mezbon bo‘lgan Buyuk Britaniya tadbirga tayyorgarlik jarayonida ko‘mirdan foydalanishni qisqartirish masalasini asosiy mavzu qilib qo‘ygandi. Ko‘mir yoqish dunyodagi issiqxona gazlarining eng katta manbai hisoblanadi.

Buyuk Britaniya bosh vaziri Boris Jonson iqlim konferensiyasida so‘zlagan nutqida iqlim muammolarini hal qilish uzoq vaqt talab qilishini aytdi. Jonson iqlim o‘zgarishiga qarshi kurashni futbol o‘yiniga qiyosladi va bu o‘yinda insoniyat 5:1 hisobida mag‘lub bo‘layotganini ta’kidladi.

COP26 Buyuk Britaniyaning Glazgo shahrida 31-oktabrda boshlangan va 12-noyabrgacha davom etadi. Unda 200 ga yaqin davlatdan vakillar ishtirok etishi kutilmoqda. Iqlim bo‘yicha sammit doirasida dastlab dunyoning 100 dan ortiq yetakchilari 2030-yilga borib o‘rmonlarning yo‘qolib ketishi jarayonini to‘xtatishga kelishib oldi.

Eslatib o‘tamiz, iqlim bo‘yicha sammit boshlanishidan bir necha kun oldin Glazgo shahrida kuchli yomg‘ir yog‘ib, ko‘chalarni suv bosgan edi.