AQSh razvedkasining minglab xodimlari emlanishdan bosh tortgani uchun ishdan bo‘shatilishi mumkin

AQSh hukumatining koronavirusga qarshi majburiy vaksinatsiya to‘g‘risidagi qaroriga rioya qilmagan razvedka xodimlari ishdan bo‘shatilishi mumkin. Bu 100 va undan ortiq xodimga ega kompaniyalarga taalluqli, deya xabar berdi “Kommersant” Associated Press’ga tayanib.

Kongressmenlar va senatorlar milliy xavfsizlik uchun muhim bo‘lgan xodimlarning ishdan chetlatilishidan xavotirda. AQSh Respublikachilar partiyasining Milliy qo‘mitasi ma’muriyat qaroriga e’tiroz bildirish uchun sudga murojaat qilishini ma’lum qildi, deyiladi xabarda.

Avvalroq AQSh Mehnatni muhofaza qilish va xavfsizlik boshqarmasi (OSHA) mamlakatdagi 100 dan ortiq ishchisi  bo‘lgan barcha kompaniyalarga 2022-yil 4-yanvargacha o‘z xodimlarini koronavirusga qarshi emlashni buyurgan edi. Kompaniyalar, shuningdek, emlanmagan xodimlardan kamida haftasiga bir marta koronavirusga topshirilgan testning salbiy natijasini  talab qilishi lozim.

Ma’lumot uchun, Pfizer yoki Moderna vaksinalarining ikkita komponentini yoki Johnson & Johnson preparatining bir dozasini olgan kishilar koronavirusga qarshi to‘liq emlangan hisoblanadi.

1-noyabr kuni Nyu-York shahrida 10 000 dan ortiq politsiya, o‘t o‘chiruvchilar va boshqa xodimlar shahar merining barcha shahar ishchilarini COVID-19 ga qarshi emlash bo‘yicha topshirig‘iga rioya qilmagani uchun haq to‘lanmaydigan ta’tilga jo‘natilgandi. Nyu-Yorkdagi 2,3 mingga yaqin o‘t o‘chiruvchi emlanishni istamayotgani uchun kasallik ta’tiliga chiqqan. Xodimlar yetishmovchiligi tufayli shahardagi 18 ta o‘t o‘chirish stansiyasi yopilgan.

Avvalroq, 20-oktabr kuni AQSh Kasalliklarni nazorat qilish va oldini olish markazi (CDC) rahbari Roshel Valenski ilgari Yevropaning bir qancha davlatlarida aniqlangan AY.4.2.— koronavirus delta shtammining yangi varianti AQShda qayd etilayotganini ma’lum qilgandi. Biroq hozirda AQShda uning yoyilishi yoki u bilan kasallanish holatlarining ko‘payishi haqida ma’lumot yo‘q.

Koronavirusning birinchi bo‘lib Buyuk Britaniyada aniqlangan yangi AY.4.2 shtammi haqidagi ma’lumotlar 19-oktabr kuni Financial Times sahifalarida paydo bo‘ldi. Ushbu mutatsiya “hindcha” shtammga nisbatan 10-15 foizga yuqumliroq bo‘lishi mumkin, deya ogohlantirdi Kembrijdagi Senger instituti hamda London universitet kollejining Genetika instituti mutaxassislari.