Shimoliy Koreya rahbari Kim Chen In mamlakatga oziq-ovqat tanqisligi tahdid solayotganini ma’lum qildi. Bu haqda Reuters xabar berdi.

Foto: Reuters

KCNA rasmiy axborot agentligining xabar berishicha, Kim rahbarligida hukmron Ishchilar partiyasi markaziy qo‘mitasining yalpi majlisi o‘tkazildi, unda bosh siyosiy yo‘nalishlardagi taraqqiyot ko‘rib chiqilib, iqtisodiy muammolarni hal qilish choralari ishlab chiqildi.

“O‘tgan yilgi tayfundan ko‘rilgan zarar tufayli g‘alla yetishtirish rejasi bajarilmay qoldi, shundan kelib chiqib hozirgi paytda aholini oziq-ovqat bilan ta’minlashda tarang vaziyat shakllanmoqda”, — deyiladi Shimoliy Koreya rahbarining bayonotida.

Kim Chen Inning ta’kidlashicha, mamlakatda koronavirus tarqalishiga qarshi qo‘llanilgan choralar vaziyatni yanada og‘irlashtirgan. Uning fikriga ko‘ra, qabul qilingan cheklovlar “aholini kiyim-kechak, oziq-ovqat va uy-joy bilan ta’minlash uchun kurash”ni uzaytirgan.

Partiya 2021-yil barcha sa’y-harakatlarni qishloq xo‘jaligiga yo‘naltirishga va COVID-19 pandemiyasi bilan kurashish yo‘llarini muhokama qilishga va’da berdi.

Qo‘mita yangi besh yillik iqtisodiy rejasini amalga oshirish uchun oldiga maqsadlar va vazifalar qo‘ydi. Fevral oyida o‘tkazilgan yig‘ilishda bayon etilgan ushbu rejada, shu jumladan, oziq-ovqat va metall ishlab chiqarishni oshirish belgilab qo‘yilgan.

Aprel oyida KXDR yetakchisi Kim Chen In mamlakatda keng miqyosda ocharchilik bo‘lishi mumkinligini tan oldi. KXDRda vaziyatning yomonlashuvidagi muhim omillardan biri bu chegaralar yopilishi sababli Xitoy bilan savdo hajmining keskin pasayishi edi.

Avvalroq Shimoliy Koreyada koronavirus tarqalishiga qarshi kurash uchun o‘rnatilgan qattiq cheklovlar sharoitida xalqaro gumanitar tashkilotlar, xususan, Jahon oziq-ovqat dasturining so‘nggi xodimlari mamlakatni tark etishga majbur bo‘lgani haqida xabar berilgandi.