АҚШ DarkSide хакерлар гуруҳининг етакчилари ҳақидаги маълумот учун 10 млн доллар мукофот эълон қилди

АҚШ ҳукумати DarkSide хакерлар гуруҳи раҳбарларининг қаердалиги ва шахсини аниқлашга ёрдам берадиган маълумот учун 10 миллион доллар мукофот тўлайди. Бу ҳақда Давлат департаменти сайтига таяниб, Meduza хабар берди.

АҚШ давлат департаменти, шунингдек, май ойида гуруҳнинг Colonial Pipeline қувур линиясига уюштирган ҳужумида иштирок этган одамларни ҳибсга олишга ёрдам берувчи маълумотлар учун қўшимча 5 миллион доллар тўлашга ваъда берди.

7 май куни хакерлар  АҚШнинг Colonial Pipeline қувур линияси компаниясига ҳужум қилганди. Улар компаниянинг компьютер тизимига зарарли дастурни киритган, натижада қувур фаолияти бир ҳафта давомида тўхтаб қолган.

Colonial Pipeline компанияси ўз қувурларини қайта ишга тушириш учун DarkSide хакерларига тахминан 5 миллион доллар миқдоридаги криптовалюта тўлашга мажбур бўлганди. Кейинчалик АҚШ Адлия вазирлиги пулнинг катта қисмини қайтариб олишга муваффақ бўлди.

Colonial Pipeline қувур линиясининг узунлиги 8800 километрдан ошади. АҚШ Шарқий соҳилига етказиладиган бензин, дизель ёқилғиси ва бошқа нефть маҳсулотларининг 45 фоизи шу қувур орқали ўтади. Компанияга уюштирилган киберҳужум АҚШнинг бир қатор штатларида бензинга талаб ортишига сабаб бўлди.

АҚШ ҳукуматидаги CNN манбаларининг таъкидлашича, DarkSide’нинг базаси Шарқий Европада бўлиб, гуруҳ асли россиялик хакерлардан иборат.