AQShda sobiq politsiyachi Erik Adams Nyu-York meri lavozimi uchun 2-noyabr kuni bo‘lib o‘tgan saylovlarda g‘alaba qozondi. U tarixda ushbu shahar meriga aylangan ikkinchi afroamerikalik, deb yozadi “Interfaks” The Hill nashriga tayanib.
“Bugun buni nishonlayapmiz, chunki ertadan haqiqiy ish boshlanadi!”, — deb yozdi Nyu-Yorkning yangi meri Twitter’da. U barcha qo‘llab-quvvatlovchilar va ko‘ngillilarga yordam uchun minnatdorchilik bildirdi.
2-noyabr, seshanba kuni Nyu-Yorkda bo‘lib o‘tgan saylovlarda AQSh Demokratik partiyasi vakili Adams 66 foizga yaqin ovoz to‘pladi. Uning respublikachi raqibi Kertis Sliva atigi 28 foizga yaqin ovoz oldi. Bu ajablanarli emas, chunki so‘nggi yillarda Nyu-York aholisi muntazam ravishda demokratlar uchun ovoz berib kelmoqda.
The Hill nashrining yozishicha, Adams iyul oyida demokratlar partiyasining praymerizi (partiya ichidan nomzod tanlash uchun dastlabki ovoz berish)da g‘alaba qozonganidan so‘ng Nyu-York meri lavozimi uchun favoritga aylandi. Bruklin tumanining amaldagi prezidenti va shtatning sobiq senatori Adams o‘zining mo‘tadil pozitsiyasi bilan mashhur. U, shuningdek, shaharda politsiya mavjudligini kengaytirish uchun faol kampaniya olib bordi.
Adams Nyu-York sobiq meri Bill de Blazioning o‘rnini egalladi. De Blazio ketma-ket ikki muddat mer bo‘lib ishlagani sababli saylovda qatnasha olmadi, chunki bu muddat shtat uchun limit.
Koronavirus pandemiyasi davrida de Blazio o‘z o‘bro‘sini qisman yo‘qotdi: uning davrida shaharda ish o‘rinlari soni keskin qisqardi, uy-joy narxi oshdi, jamoat transporti faoliyatidagi muammolar kuchaydi.
Nyu-York meri lavozimini egallagan birinchi afroamerikalik Devid Dinkins edi, u mazkur lavozimda 1990-yildan 1993-yilgacha ishlagan.
Izoh (0)