АҚШда собиқ полициячи Эрик Адамс Нью-Йорк мэри лавозими учун 2 ноябрь куни бўлиб ўтган сайловларда ғалаба қозонди. У тарихда ушбу шаҳар мэрига айланган иккинчи афроамерикалик, деб ёзади «Интерфакс» The Hill нашрига таяниб.
«Бугун буни нишонлаяпмиз, чунки эртадан ҳақиқий иш бошланади!», — деб ёзди Нью-Йоркнинг янги мэри Twitter’да. У барча қўллаб-қувватловчилар ва кўнгиллиларга ёрдам учун миннатдорчилик билдирди.
2 ноябрь, сешанба куни Нью-Йоркда бўлиб ўтган сайловларда АҚШ Демократик партияси вакили Адамс 66 фоизга яқин овоз тўплади. Унинг республикачи рақиби Кертис Слива атиги 28 фоизга яқин овоз олди. Бу ажабланарли эмас, чунки сўнгги йилларда Нью-Йорк аҳолиси мунтазам равишда демократлар учун овоз бериб келмоқда.
The Hill нашрининг ёзишича, Адамс июль ойида демократлар партиясининг праймеризи (партия ичидан номзод танлаш учун дастлабки овоз бериш)да ғалаба қозонганидан сўнг Нью-Йорк мери лавозими учун фаворитга айланди. Бруклин туманининг амалдаги президенти ва штатнинг собиқ сенатори Адамс ўзининг мўътадил позицияси билан машҳур. У, шунингдек, шаҳарда полиция мавжудлигини кенгайтириш учун фаол кампания олиб борди.
Адамс Нью-Йорк собиқ мэри Билл де Блазионинг ўрнини эгаллади. Де Блазио кетма-кет икки муддат мер бўлиб ишлагани сабабли сайловда қатнаша олмади, чунки бу муддат штат учун лимит.
Коронавирус пандемияси даврида де Блазио ўз ўбрўсини қисман йўқотди: унинг даврида шаҳарда иш ўринлари сони кескин қисқарди, уй-жой нархи ошди, жамоат транспорти фаолиятидаги муаммолар кучайди.
Нью-Йорк мэри лавозимини эгаллаган биринчи афроамерикалик Дэвид Динкинс эди, у мазкур лавозимда 1990 йилдан 1993 йилгача ишлаган.
Изоҳ (0)