Pentagon Eronning tankerni qo‘lga olish borasidagi ayblovini bema’ni deb atadi

Pentagon rasmiy vakili Jon Kirbi AQSh Eronning neft tankerini qo‘lga olmoqchi bo‘lmagani, bu kabi ayblovlar bema’ni ekanini ma’lum qildi, deb xabar beradi “RIA Novosti”.

U ushbu ma’lumotni nafaqat rad etishini, balki “bu bema’ni ayblov” ekanini ta’kidlagan.

Eron OAVlari mamlakatning harbiy-dengiz kuchlari 3-noyabr kuni Ummon ko‘rfazida Qo‘shma Shtatlarning neft tankerini qo‘lga olish borasidagi urinishini bartaraf etgani haqida xabarlar tarqatgan. Qayd etilishicha, Amerika armiyasi bir necha vertolyot va kemalardan foydalangan holda tankerni ta’qib qilgan.

Avvalroq Eron Aden ko‘rfazi yaqinida neft tankeriga qarshi qaroqchilar hujumining oldini olgani to‘g‘risida xabar berilgandi. “Shubhali” qayiqlardagi to‘rt-oltita qurolli qaroqchilar tankerga hujum qilish niyatida yaqinlashmoqchi bo‘lgan, biroq bortdagi kuzatuv guruhi o‘z vaqtida chora ko‘rib, ogohlantiruvchi o‘t ochgan, qaroqchilar voqea joyidan qochishga majbur bo‘lgan.