Грузия президенти Саломе Зурабишвили мамлакатнинг собиқ президенти Михаил Саакашвилини ҳеч қачон афв этмаслиги ва ушбу масалани бошқа муҳокама қилишни ниятида эмаслигини маълум қилди, деб хабар беради «ТАСС».
«Собиқ президентни (Саакашвили — таҳр.) афв этиш борасидаги позициям аниқ ва ўзгармас — йўқ ва ҳеч қачон. Ушбу масалага бошқа ҳеч қачон қайтмайман», — дейди Зурабишвили.
Шунингдек, у Саакашвилини сиёсий маҳбус деб ҳисобламаслигини таъкидлаган. «Собиқ президент на сиёсий маҳбуснинг, на бегуноҳ қурбоннинг мезонларга жавоб беради. У мамлакатга ўз хоҳиши билан ва ноқонуний йўл орқали келди. Унинг келишидан мақсади вазиятни издан чиқариш», — дейди давлат раҳбари.
Шу билан бирга, у Адлия вазирлигини Саакашвилининг аҳволи ёмонлашиши мамлакатда спекуляция ва вазиятни издан чиқаришга сабаб бўлмаслиги учун уни «муҳим маҳбус» дея ҳисоблаб, соғлиғи ҳақида қайғуришга чақирган.
Эслатиб ўтамиз, 1 октябрь куни Михаил Саакашвили саккиз йилдан буён биринчи марта Грузияга келди. У чегарани ноқонуний кесиб ўтганлик айблови билан қўлга олинди. Шундан кейин Грузияда мухолифат норозилик намойишлари бошланди, улар Саакашвили озод этилишини талаб қилди. Ҳозир у Рустави шаҳридаги қамоқхонада, у ерда ўзини сиёсий маҳбус деб ҳисоблагани учун очлик эълон қилган.
Грузия Адлия вазирлиги собиқ президентни қамоқхона касалхонасига ётқизишни бир неча бор таклиф қилган, бироқ Саакашвили ва унинг адвокатлари бунга мутлақо қарши. Улар Грузиянинг собиқ раҳбарини хусусий фуқаролик клиникасига олиб боришни талаб қилмоқда.
Изоҳ (0)