Судан ҳарбийлари томонидан ҳокимиятдан четлатилган мамлакат бош вазири Абдулла Хамдок Суданнинг янги ҳукуматига бошчилик қилишга рози бўлди. Бу ҳақда Al Arabiya телеканалига таяниб, «ТАСС» хабар берди.
Хабарга кўра, Хамдок мамлакатдаги сўнгги намойишлар чоғида сиёсий сабабларга кўра ҳибсга олинганларнинг барчаси озод этилиши шарти билан, бош вазир лавозимини қайта эгаллашга рози бўлган. Бундан ташқари, ҳокимиятдан ағдарилган Судан бош вазири мамлакатда «конституциявий институтлар 25 октябргача (у бош вазир лавозимидан четлатилгунга қадар) қандай фаолият кўрсатган бўлса яна шундай шаклда тикланиши кераклигини» таъкидламоқда.
Телеканалга кўра, агар Хамдок бош вазир лавозимини эгалласа, у бошчилигидаги янги Вазирлар Маҳкамаси «сиёсий мустақил мутахассислардан иборат малакали ҳукумат»га айланади.
Шу билан бирга, Хамдокнинг Вазирлар Маҳкамаси раҳбари лавозимини эгаллаш эҳтимоли бўйича Судан ҳарбийлари билан музокаралари ҳақидаги маълумотлар турлича. Sky News Arabia телеканалининг хабар беришича, собиқ бош вазир бу талабларни мулоқотни бошлаш шартлари сифатида илгари сурган. Ўз навбатида, Al Arabiya ҳам томонлар ўртасидаги музокаралар ижобий давом этаётганини маълум қилди.
Суданда бир неча ҳафта давом этган норозилик намойишларидан сўнг ҳарбийлар 25 октябрга ўтар кечаси Хамдокни, шунингдек, қатор юқори мартабали амалдорлар ва сиёсатчиларни ҳибсга олди. Мамлакат раҳбари генерал Абдул Фаттоҳ ал-Бурҳон олий ҳокимият органларини ишдан бўшатиб, фавқулодда ҳолат эълон қилди. Шунингдек, у конституциявий декларациянинг мамлакатдаги ўтиш даври асосларини, шунингдек, ҳарбий ва фуқаролик ҳокимияти ўртасидаги муносабатларни белгилаб берувчи қатор моддаларини тўхтатиб қўйди.
Изоҳ (0)