Турк киносаноати мухлисларига янги ва қизиқ сюжетга эга сериаллар ҳақида маълумот бериб ўтамиз.
«Эл қизи»
2021 йилнинг 23 октябрь куни Туркиянинг Fox ТВ канали орқали экран юзини кўрган сериалда Севда Эргинжи, Исмаил Эге Шашмаз бош қаҳрамон ролини ижро қилади. Қаҳрамон қиз онасидан эрта айрилади. Кунлардан бир кун онасининг қотили ким экани ҳақида хабар топади. Кутилмаганда Исмаил гавдалантирган қаҳрамон ҳаётига кириб келади ва ҳаёти ўзгариб кетади.
«Менинг ҳаётим»
«Менинг ҳаётим» сериали 2021 йилнинг 31 октябрь куни Star TV каналида экран юзини кўрди. Унда Нилсу Берфин Акташ, Генжо Озак бош қаҳрамон сифатида намоён бўлган. Ҳаёт исмли қиз дизайнер бўлишни орзу қилади. Аммо орзулар ҳамиша ҳам ҳаётга тўғри келавермайди, олам-олам орзулари бор қизнинг бадавлат хонадонда оқсоч бўлиб ишлашига тўғри келади.
«Уч куруш»
2021 йилнинг 1 ноябрида Show TV канали орқали эфирга узатилган сериалда томошабинлар «Элчининг қизи»даги роли билан машҳур бўлган Ураз Кайгилароғлуни кўриши мумкин. Шунингдек, Экин Коч, Аҳмет Рифат Шунгар бош қаҳрамонни гавдалантирган. Сериал ҳар бири ўз йўлини танлаган уч нафар эски дўст ҳақида ҳикоя қилади. Бири қурол олди-сотдиси билан шуғулланадиган, иккинчиси полициячи бўлган ва учинчиси, озодликдан маҳрум қилинган дўстларнинг йўли орадан йиллар ўтиб кесишади.
«Сенга вада бераман»
2021 йилнинг 2 ноябрь куни Star TV орқали экран юзини кўрган сериалда Эркан Петеккая, Нехир Эрдоғон суратга тушган. Муваффақиятли полициячи Омер ва жиноятлар билан боғлиқ воқеаларни ёритадиган бошловчи Элиф, айбсизларни ҳимоя қилиш учун бирлашади ва ҳамкорлик қилади.
«Азиз»
Мурат Йилдирим, Дамла Сонмез бош қаҳрамонни гавдалантирадиган сериалининг премьераси 2021 йилнинг 5 ноябрида бўлиб ўтади. Азиз Пайдар исмли инсоннинг ҳаёти француз миллатига мансуб Пьер исмли шахснинг ўз фарзанди, лейтенант Андрени ўлдирганидан кейин ўзгариб кетади. У ўзи туғилиб ўсган, ўша вақтда французлар оккупациясида бўлган Антакяни тарк этишга мажбур бўлади. Орадан икки йил ўтганидан кейин у ортга қайтади ва уни аллақачон ўлган деб юрган оила аъзолари шокка тушади. Бу вақтга келиб қайлиғи Дилруба, унинг яқин дўсти Адамга унаштирилган бўлади.
«Албатта, бир кун»
7 ноябрь куни экранга узатиладиган сериалда Синем Унсал, Шабнам Бозокли, Кенан Ажар ва Бурак Ямантурк суратга тушади. Кунлардан бир куни Каппадокиядаги ташландиқ уйлардан бирида 15 йил аввал ўлдирилган бир оилага тегишли 5 та мурда топилади. Қизиғи шу оиланинг бошқа икки аъзоси тирик қолган ва ҳар иккиси ўз йўлидан кетган. Журналист Мурат Гувеннинг «Йўқотилган ҳаётлар» номли кўрсатувида ушбу ҳикоя билан бўлишганидан кейин қизларнинг ҳаёти ўзгариб кетади.
«Алпарслон: Буюк Салжуқий»
Бариш Ардуч ва Фаҳрия Эвжен бош қаҳрамонни гавдалантирган «Алпарслон: Буюк Салжуқий» номли сериал, 8 ноябрда экран юзини кўради. «Уйғониш: Буюк Салжуқий»га приквел бўлган сериалда Салжуқийлар давридан аввалроқ юз берган воқеа ва ҳодисалар кўрсатилади.
«Меҳмон»
Fox TV орқали 2021 йилнинг 11 ноябрида экранга узатилиши режалаштирилаётган сериалда Хазал Кая, Бурга Гулсай ва Озан Долунай суратга тушган. Ҳаёти давомида севги нималигини билмаган қизнинг ҳикояси оила қуриш билан бошланади. Аммо ёлғон билан бошланган ҳикоя кутилмаган финалга сабаб бўлади.
«Яширин»
23 ноябрда BluTV интернет платформасида эфирга узатиладиган сериалда Фират Челик, Ҳазар Эргучли суратга тушади. Американинг «The Affair» сериалининг ремейки бўлган лойиҳада оиласи бўла туриб бир-бирига ошиқ бўлган жуфтлик ҳақида ҳикоя қилинади. Уларнинг ўртасидаги муносабатлар томонларнинг жиддий психологик муаммоларига сабаб бўлади.
«Достон»
Куз фаслида премьераси бўлиб ўтилиши кутилаётган сериалда «Беқарор»даги роли билан яхши маълум бўлган Эбру Шаҳин, Эдип Тепели билан бирга суратга тушади. Унда оддий қиз ва хоннинг фарзанди ўртасидаги севги ҳақида ҳикоя қилинади. Воқеалар IX аср, Ўрта Осиё ҳудудида юз беради. Сериал 14-15 мамлакат томонидан аллақачон сотиб олинган. «Достон» сотиб олинган мамлакатларда Туркия билан бир вақтда трансляция қилинади.
«Мавлоно»
Премьераси кузнинг охири ёки қиш фаслининг бошида бўлиб ўтиши кутилаётган сериалда Бюлент Инал суратга тушади. 30 қисмдан иборат бўладиган сериалнинг давомийлиги 60 дақиқани ташкил қилади. TRT1 каналида эфирга узатиладиган лойиҳани мухлислар ҳафта давомида икки марта томоша қилиши мумкин.
Изоҳ (0)