Aktyor Uill Smit ortiqcha vazn va ruhiy muammolarga qarshi kurashga bag‘ishlangan Best Shape of My Life – “Hayotimning eng yaxshi shakli” yangi hujjatli filmining treylerini taqdim etdi. Video aktyorning YouTube’dagi kanalida paydo bo‘ldi, deb yozadi “Korrespondent.net”.
Olti qismdan iborat serialda tomoshabinlar Smitning 20 hafta ichida to‘qqiz kilogramm yo‘qotishga bo‘lgan harakatini ko‘rishi mumkin.
“Bu tana meni pandemiya va uydagi son-sanoqsiz kunlardan olib o‘tdi. Tanamni yaxshi ko‘raman, lekin o‘zimni yanada yaxshi his qilishni xohlayman. Yarim tunda shirinlik tanovul qilishlar yo‘q”, — deb yozgan u Instagram’da.
Treylerda Uill ortiqcha vazn tashlash yo‘lida o‘zining ruhiy salomatligiga e’tibor qaratish kerakligini tushunganini va o‘z joniga qasd qilish haqida o‘ylaganini tan oladi.
“Men dunyoga o‘zim haqimda qanchalar kam bilishimni ko‘rsataman”, — deydi aktyor. Filmning birinchi qismi namoyishi 2021-yil 8-noyabrga belgilangan. Bu Smitning 2021-yil 9-noyabrda chiqishi kutilayotgan “Uill” nomli memuariga to‘g‘ri kelishi kerak.
Izoh (0)