“Tutash taqdirlar” serialidagi Ra’no obrazi bilan tomoshabinlar mehrini qozongan aktrisa hozir qayerda? (foto)

2009-yil ekran yuzini ko‘rgan “Tutash taqdirlar” seriali o‘z davrining eng shov-shuvli loyihasi bo‘lgandi. Rejissor Zamira Begimqulovaning mazkur serialida raqqosa qiz Ra’no rolini ijro etgan debyutant Nafisa Mamadiyorova ham tomoshabinlar mehrini qozongandi. Lekin aktrisa serialdagi muvaffaqiyatli ishtirokidan so‘ng ko‘rinmay ketdi. Jurnalist Nargiza Murodova Nafisa Mamadiyorova bilan suhbatda bo‘lib, ko‘pchilikni qiziqtirgan savollarga javob oldi.

“San’atni tark etganim yo‘q”

—  “Tutash taqdirlar” seriali ommaga taqdim etilgach, turmushga chiqdim. Undan keyin ham bir-ikki marta rollarga taklif etishdi. Ammo oilaviy sharoitim sabab ularni rad etdim. Chunki turmushga chiqqan ayolning o‘ziga yarasha shirin tashvishlari ko‘p bo‘ladi. Agar “dekret” ta’tillarini inobatga olmasa, ijodni to‘xtatmaganman. Shunchaki bor e’tiborimni o‘z kasbim — raqqosalikka qaratganman.

“Serialda suratga tushishni istamagandim”

— “Tutash taqdirlar” serialida rol ijro etishim juda qiziq kechgan. Hamma qizlar serialda suratga tushishga intilsa, men biror marta ham orzu qilmaganman. Farg‘ona davlat san’at bilim yurtini bitirib, O‘zbekiston Qurolli kuchlar ansamblida raqqosa bo‘lib ishlardim. Bir kuni ustozim Ziyoda Madrahimovaning oldiga rejissor Zamira Begimqulova kelib, rol uchun raqqosa qiz izlayotganini aytibdi. Shunda ustozim “Mayli, qizlarni ko‘ring, mos kelganini aytarsiz”, debdi. Zamira opa ancha vaqt mashg‘ulotimizni ko‘rib, keyin Ziyoda Madrahimovaga mening tashqi ko‘rinishim ma’qul kelganini aytibdi. Ziyoda opa kulib, “Men ham sizga Nafisani tavsiya qilmoqchi edim”, debdi. Rosti, serialda suratga tushishni umuman istamadim. Shunda ustozim, “Men yoningda bo‘laman, raqqosa qizning ichki kechinmalarini ochib berishing kerak”, deb tushuntirgandan keyin rolga rozi bo‘ldim.

— Syomka kuni yaqinlashgan sari hayajonim ortgan. Chunki o‘zimni rolda umuman tasavvur qilolmaganman. Zamira Begimqulovaga “Nega meni tanladingiz, sizni uyaltirib qo‘yishdan qo‘rqyapman”, deganimda “Qahramonim xuddi sendek sodda qiz, tashqi ko‘rinishingning o‘zi rol muvaffaqiyatini ta’minlaydi”, degandi. Suratga olish jarayonlari oson kechmagan. Hayotda otasiz o‘sganim uchun ota bilan qiz o‘rtasida qanday munosabat bo‘lishini bilmasdim. Shu bois marhum san’atkor Hoshim Arslonovni biroz qiynab qo‘yganman. Keyin yig‘lash sahnalari qayta-qayta suratga olinishiga to‘g‘ri kelgan.

“Harbiy insonga turmushga chiqdim”

— Turmush o‘rtog‘im A’zamjon aka harbiy bo‘lsa-da, san’atni hurmat qiladi. U inson bilan serial suratga olinmasidan avval tanishganmiz. Munosabatlarimiz jiddiy bo‘lgani uchun “Serialga taklif etishyapti, suratga tushsam qarshi emasmisiz?” deb roziligini olganman. Ammo serial efirga berilganda rashk qilgan paytlari ham ko‘p bo‘lgan. Ayniqsa, tomoshabinlar tasodifan “Feruzbekka uzukka ko‘z qo‘ygandek mossiz” deyishsa, rosa xijolat bo‘lardim. Qaynanam serialdagi rolimni ko‘rib yoqtirib qolgan. Ba’zilar “Qaynanangiz faoliyatingizga qarshi bo‘lmaydimi?” deb ko‘p so‘rashadi. Baxtim shundaki, qaynanam san’atsevar inson. Ijod qilishim uchun mendan ham ko‘proq qayg‘uradi.

Nafisa Mamadiyorova hozirgi seriallarni kuzatasizmi va rejissorlar rol taklif etilsa, qabul qilasizmi, degan savolimizga quyidagicha javob berdi.

“Rostini aytsam, hozirgi seriallarni umuman kuzatmayman. Sababi men ishlaydigan ansamblda konsert dasturlari va gastrol safarlari nihoyatda ko‘p. Ishdan kelgach, hamma ayollar qatori uy ishlari bilan bo‘lib, serial ko‘rishga vaqt topmayman. Ilgari farzandlarim kichikligi uchun rollarni rad etgandim. Endi takliflar bo‘lsa, o‘ylab ko‘rishim mumkin. Faqat rol raqqosalik faoliyatimga yaqin bo‘lishi kerak. O‘g‘lim Islombek 10 yoshda, qizim Ruxsora 5 yoshda. Demak, endi serialga suratga tushish haqida o‘ylab ko‘rsam bo‘ladi”.

Nafisa Mamadiyorova ijtimoiy tarmoqlarda nima sababdan faol emasligi va tashqi ko‘rinishining o‘zgarmasligi siri bilan ham o‘rtoqlashdi.

—Deyarli internetdan foydalanmayman. Onda-sonda Telegram’dagi xabarlarga ko‘z yugurtirib qo‘yaman, xolos. Qolgan birorta ijtimoiy tarmoqdan foydalanishga zarurat sezmayman. Menimcha, internet vaqtni o‘g‘irlab qo‘yadi. Hayotda oddiylikni yaxshi ko‘raman, go‘zallik saloniga ham deyarli bormayman. Xudo bergan go‘zallikni o‘zgartirishni istamayman. Balki o‘zgarmasligimning siri shundadir.

Ma’lumot uchun: Nafisa Mamadiyorova (Rahmatova) 1986-yil Farg‘ona shahrida dunyoga kelgan. Oilada ikki qizning kenjasi. 2010-yil A’zamjon Mamadiyorov bilan oila qurgan.