Qozog‘iston hukumati Facebook’dan ijtimoiy tarmoqning ichki kontent tizimiga kirish uchun ruxsat olganini e’lon qildi. Biroq Facebook buni inkor etmoqda

Qozog‘iston Axborot va ijtimoiy rivojlanish vazirligi (AIRV) va Facebook ijtimoiy tarmog‘i internetda bolalar huquqlarini himoya qilishga alohida e’tibor qaratgan holda zararli kontentga qarshi kurashda yaqindan hamkorlik qilish bo‘yicha kelishuvga erishdi. Bu haqda vazirlik matbuot xizmatiga tayanib, Tengrinews  xabar berdi.

“Qozog‘iston Respublikasi hukumatiga axborot makonining xavfsizligini ta’minlash masalasini hal qilishda yordam berish maqsadida Facebook Qozog‘istonga ‘Kontent haqida xabar berish tizimi’ — Content Reporting System (CRS) ichki tizimiga to‘g‘ridan to‘g‘ri eksklyuziv kirishni taqdim etdi. CRS vazirlikka Facebook’ning global kontent siyosati va Qozog‘iston Respublikasi milliy qonunchiligining buzilishini o‘z ichiga olgan kontent haqida zudlik bilan xabar berishga imkon beradi”, — deyiladi xabarda.

Vazirlik ma’lumotlariga ko‘ra, Qozog‘iston Markaziy Osiyoda tizimga kirish huquqini qo‘lga kiritgan va kontent siyosati uchun mas’ul bo‘lgan xalqaro Facebook jamoasi bilan to‘g‘ridan to‘g‘ri aloqa kanaliga ulangan birinchi davlatdir.

AIRV, shuningdek, Facebook’ning jamoatchilik bilan aloqalar bo‘yicha mintaqaviy direktori Jorj Chenning so‘zlariga asoslanib, kompaniya Qozog‘iston hukumati bilan, ayniqsa, internetda bolalar xavfsizligini ta’minlash bo‘yicha hamkorlikda olib borilayotgan ishlardan mamnun ekanini aytdi.

“Uzoq muddatli hamkorligimiz yo‘lidagi birinchi qadam sifatida biz Qozog‘iston hukumatiga ‘Kontent haqida xabar berish tizimi’dan foydalanish imkoniyatini berishdan mamnunmiz, bu Qozog‘iston hukumatining vakolatli organlariga zararli kontent bilan yanada samarali kurashishda yordam beradi, deb umid qilamiz. Facebook jamoasi, shuningdek, kibermakon xavfsizligini ta’minlash manfaati yo‘lida qozog‘istonlik mutaxassislarni o‘qitishni davom ettiradi”, — deya vazirlik Facebook vakili so‘zlaridan iqtibos keltirdi.

Qayd etilishicha, 28-oktabr kuni Facebook jamoasi vazirlik mutaxassislari uchun tizim bilan ishlash bo‘yicha trening o‘tkazgan. Noyabr oyining boshidan vazirlik jamoa bilan ish boshlaydi.

AIRV ma’lumotlariga ko‘ra, tomonlar, shuningdek, doimiy hamkorlik mexanizmini yo‘lga qo‘yish, jumladan, vazirlik bilan yaqindan hamkorlik qiladigan Facebook hududiy ofisining vakolatli vakilini belgilashga ham kelishib olgan.

Facebook tarmog‘ining egasi Meta Platforms Qozog‘iston AIRVning Facebook Qozog‘istonga ijtimoiy tarmoqning “Kontent haqida xabar berish tizimi”ga eksklyuziv kirish uchun ruxsat bergani haqidagi bayonotini rad etmoqda. Bu haqda Reuters agentligiga Facebook’ning Osiyo-Tinch okeani mintaqasidagi siyosiy kommunikatsiyalar direktori Ben Makkonagi elektron pochta orqali xabar bergan.

“Birinchidan, biz Qozog‘iston hukumati bilan qo‘shma bayonot chiqarmadik, aksincha, Qozog‘iston hukumati bizning hukumatlardan mahalliy qonunlarni buzuvchi kontentni cheklash to‘g‘risidagi so‘rovlarimiz bo‘yicha global jarayon davomida ular bilan olib borgan muhokamalarimiz asosida o‘z bayonotini berdi”, — deyiladi xabarda.

Makkonagining qo‘shimcha qilishicha, bu jarayon “faqat Qozog‘istonga xos emas, bu butun dunyo hukumatlari qo‘llayotgan jarayondir”. O‘z navbatida, Qozog‘iston AIRV rahbari Aida Balayevaning aytishicha, avvalroq e’lon qilingan bayonot matni “unda tilga olingan hududiy ofis rahbariyati bilan to‘liq kelishilgan”.

“Facebook’ning qo‘shma bayonotni inkor etishi haqida. OAVning qo‘shma bayonot Meta (Facebook) Osiyo-Tinch okeani mintaqasi bo‘limining aloqalar bo‘yicha direktori Ben Makkonagi tomonidan rad etilgani haqidagi xabarlari munosabati bilan Qozog‘iston Respublikasi Axborot va ijtimoiy rivojlanish vazirligi quyidagilarni ma’lum qiladi. Axborot va ijtimoiy rivojlanish vazirligi Gonkongda joylashgan Xitoy, Mo‘g‘uliston va Markaziy Osiyo mintaqasi bo‘yicha Meta (Facebook) hududiy ofisi bilan muzokaralar o‘tkazdi. 1-noyabr kuni e’lon qilingan qo‘shma bayonot matni va uning ommaviy axborot vositalarida e’lon qilinishi mazkur hududiy ofis rahbariyati bilan to‘liq kelishilgan”, — deb yozdi vazir o‘zining Facebook’dagi sahifasida.

Eslatib o‘tamiz, 28-oktabr kuni Facebook kompaniyasining nomi Meta’ga o‘zgardi. Qayd etilishicha, Facebook ushbu yo‘l bilan kompaniyaning nafaqat bitta ijtimoiy tarmoq, balki WhatsApp, Instagram, Oculus va boshqa aktivlarining ham egasi ekanligini namoyish qilmoqchi.