Tesla va SpaceX asoschisi Ilon Maskning real vaqtda hisoblab boriladigan boyligi 300 milliard dollardan oshdi, deb xabar beradi Meduza.
Forbes Real Time reytingi versiyasiga ko‘ra, 1-noyabr holati bo‘yicha Maskning boyligi 13,1 milliard dollarga oshgan va hozirda 305,7 milliard dollarni tashkil etmoqda. Bloomberg Billionairese Index biznesmenning boyligini 311 milliard dollarga baholamoqda.
Ilon Mask boyligining asosiy qismini Tesla’dagi 21 foizli ulushi tashkil etadi. Maskning boyligi o‘nlab milliard dollarga so‘nggi bir necha oy ichida Tesla aksiyalarining qimmatlashuvi hisobiga ortmoqda. Kompaniya aksiyalari yangi hisobotlar e’lon qilinganidan keyin ko‘tarila boshladi. 25-oktabrda ma’lum vaqt Tesla’ning bozor kapitallashuvi hatto 1 trillion dollarlik chegarani ham buzishga muvaffaq bo‘ldi. Ushbu ko‘rsatkichga erishishga Hertz avtoulovlarni ijaraga berish servisi uchun 100 mingta elektromobil yetkazib berish kelishuvi haqidagi xabarlar yordam berdi.
Eslatib o‘tamiz, sentabr oxirida Mask dunyoning eng badavlat insoniga aylangach, Bezosga 2 raqami tushirilgan ulkan haykal va kumush medal yuborganini ma’lum qilgandi. Ilon Mask Jeff Bezosni birinchi bor 2021-yil yanvarida ortda qoldirib, dunyodagi eng boy insonga aylangan edi. Keyinroq ikkinchi o‘ringa, may oyida esa Bloomberg Billionaires Index versiyasiga ko‘ra, uchinchi o‘ringa tushib qolgandi. Amazon asoschisi ushbu nomni 2017-yildan buyon o‘zida saqlab kelayotgandi. 2020-yil boshida Mask eng badavlat insonlar reytingining eng oxirgi pog‘onasini egallagandi, ammo bir yil ichida uning boyligi taxminan 150 milliard dollarga oshdi.
Izoh (0)