Turkmaniston Afg‘onistonning hukumat delegatsiyasini mamlakatga tashrif buyurishga taklif qildi. Bu haqda Turkmaniston bosh vaziri o‘rinbosari, tashqi ishlar vaziri Rashid Meredov boshchiligidagi delegatsiyaning 30—31-oktabr kunlari Kobulga amalga oshirgan ishchi tashrifi yakunida ma’lum qilingan, deb xabar beradi “Interfaks”.
Tashrif davomida Meredov Afg‘onistonning yuqori martabali shaxslari, xususan, Afg‘oniston hukumati raisi Muhammad Hasan Ohund bilan uchrashuvlar o‘tkazgan.
Meredov Turkmaniston tomoni Afg‘onistonning yangi davlat organlari bilan konstruktiv muloqot va yaqin hamkorlikka tayyorligini ta’kidlab, Turkmaniston qo‘shni davlat sifatida mamlakatning siyosiy barqarorligi va xavfsizligi, afg‘on xalqi farovonligi va birdamligidan chuqur manfaatdor ekanini qayd etgan.
Tomonlar sanoatning muhim tarmoqlaridagi qo‘shma loyihalarni amalga oshirish sur’atini jadallashtirishga e’tibor qaratgan. Shu munosabat bilan tomonlar Turkmaniston—Afg‘oniston—Pokiston—Hindiston gaz quvurini, Turkmaniston—Afg‘oniston—Pokiston elektr tarmoqlari liniyasini va Turkmanistondan Afg‘onistonning ayrim viloyatlariga temiryo‘llarni qurish borasidagi hamkorlikka tayyorligini bildirgan.
Meredov Afg‘oniston tashqi ishlar vaziri vazifasini bajaruvchi Amirxon Muttaqiy bilan siyosiy, diplomatik va gumanitar hamkorlik sohasidagi kun tartibidagi ikki tomonlama ustuvor masalalarni muhokama qilgan. Turkmaniston tomoni Afg‘oniston hukumati delegatsiyasini Turkmanistonga tashrif buyurishga taklif qilgan.
Shuningdek, u Mulla Muhammad Yoqub bilan xavfsizlik masalalari bo‘yicha uchrashuv o‘tkazgan, unda Afg‘oniston mudofaa, ichki ishlar vazirlari, milliy xavfsizlik va chegara xizmati boshqarmalari rahbarlari ishtirok etgan.
Eslatib o‘tamiz, 16-oktabr kuni Afg‘oniston muvaqqat hukumati rahbarining o‘rinbosari vazifasini bajaruvchi Abdulla Salam Hanafiy boshchiligidagi delegatsiya Termizga tashrif buyurib, O‘zbekiston hukumati vakillari bilan muzokara o‘tkazgan edi.Muzokaralar chog‘ida turli vazirlik va idoralar vakillari chegara xavfsizligi, investitsiyalar, o‘zaro savdo, energetika, xalqaro yuk tashish hamda tranzit sohalaridagi hamkorlik masalalari muhokama qilingandi. Shuningdek, ta’lim va gumanitar sohalardagi aloqalarni rivojlantirish borasida ham fikr almashilgan.
Izoh (0)