O‘zbekistonda 2021-yil yanvar—sentabr oylarida biznes-ombudsmanga murojaat qilgan tadbirkorlar soni ikki baravarga ko‘paydi. Bu haqda Biznes-ombudsman bo‘lim boshlig‘i Nozima Saidaliyeva 1-noyabr kuni AOKAda bo‘lib o‘tgan brifingda ma’lum qildi.
Qayd etilishicha, 2021-yilning 9 oyida biznes-ombudsman tomonidan tadbirkorlarning 5 mingdan ortiq murojaati o‘rganilgan. Bu ko‘rsatkich o‘tgan yilning mos davriga qaraganda ikki baravarga ko‘p.
Ta’kidlanishicha, ko‘rib chiqilgan murojaatlarning deyarli 3 mingtasi qanoatlantirilgan. Qolganlari yuzasidan tushuntirish berilgan.
Biznes-ombudsman tomonidan 9 oyda tadbirkorlar manfaatida sudlarga 28 milliard so‘mlik da’vo arizalar kiritilgan. 2021-yil ma’muriy javobgarlikka tortilganlar soni keskin ko‘paygan va o‘tgan yilga nisbatan 740 nafarga oshgan.
Biznes-ombudsmanga eng ko‘p murojaat Toshkent shahridan kelib tushgan — 643 ta. Shuningdek, Toshkent viloyatidan 583 ta, Qoraqalpog‘istondan 540 ta murojaat yo‘llangan. Sohalar kesimida yer masalasi (1179) va kredit ajratilishi (1119) tadbirkorlarni eng qiynayotgan muammolar sifatida qayd etilgan.
Eslatib o‘tamiz, O‘zbekistonda 2017—2021-yillarda olib borilgan islohotlar haqida veb-sayt ishga tushirilgandi. Undagi ma’lumotlarga ko‘ra, shu yillar mobaynida biznes-ombudsmanga 13,4 ming ariza kelib tushgan. Natijada 930 mas’ul shaxs intizomiy, 1513 tasi ma’muriy javobgarlikka tortilgan. Davlat va nazorat organlarining 1034 noqonuniy qarorlari bekor qilinib, sud orqali tadbirkorlik subyektlari foydasiga 95,1 milliard so‘m undirilgan.
Mavzuga doir:
- Namanganda 2020-yilda biznes-ombudsman vakillari tomonidan sudlarga kiritilgan da’vo arizalarining barchasi tadbirkorlar foydasiga hal etildi
- 2020-yilda Prezident qabulxonalariga 1 milliondan ortiq murojaat kelib tushgan
- O‘zbekiston Moliya vazirligiga kelib tushgan murojaatlarning 60 foizida pensiya miqdorini oshirish so‘ralgan
Izoh (0)