Markaziy bank 2021-yil 9 oyi yakunlari bo‘yicha tijorat banklari tomonidan amalga oshirilgan kreditlash va banklarda yuzaga kelgan muammoli kreditlarning turli segmentlari bo‘yicha o‘tkazilgan tahlil natijalarini taqdim etdi. Bu haqda “Spot” xabar bermoqda.
Tahlil natijalariga ko‘ra, joriy yil 9 oyi davomida bank tizimida jismoniy shaxslarning muammoli kreditlari hajmi 5,4 baravarga o‘sgan.
Qayd etilishicha, bank tizimida muammoli kreditlar ulushi 2021-yilning iyul oyida eng yuqori darajaga (6,2 foiz) yetgan. Muammoli kreditlar ulushi avgust—sentabr oylarida 0,4 foizga kamayib, 1-oktabr holatiga 5,8 foizni yoki 18,1 trillion so‘mni tashkil etgan.
Mijozlar bo‘yicha muammoli kreditlarning 29 foizi (5,2 trillion so‘m) jismoniy shaxslar va 71 foizi (12,9 trillion so‘m) yuridik shaxslarga ajratilgan kreditlar hissasiga to‘g‘ri keladi.
Ta’kidlanishicha, tarmoqlar kesimida muammoli kreditlarning o‘sishi, asosan, transport va kommunikatsiya, qishloq xo‘jaligi, savdo va umumiy ovqatlanish va qurilish sohalari hissasiga to‘g‘ri kelgan.
Shuningdek, 2021-yil 9 oyi davomida bank tizimida yuridik shaxslarning muammoli kreditlari hajmi 2,6 baravarga o‘sgan. Jismoniy shaxslarning muammoli kreditlari hajmi esa 5,4 baravar oshib, ularning jami muammoli kreditlardagi ulushi 17 foizdan 29 foizga yetgan.
Eslatib o‘tamiz, Markaziy bank 2021-yilning dastlabki olti oyi uchun ipoteka kreditlari sharhini e’lon qilgandi. Unga ko‘ra, jami ajratilgan ipoteka kreditlari bo‘yicha 90 kundan ortiq vaqt davomida qaytarilmayotgan kredit qarzdorligi miqdori (muammoli kreditlar) 480 milliard so‘mni tashkil etib, o‘tgan yilning mos davriga nisbatan 364,2 milliard so‘mga, 2021-yil boshiga nisbatan esa 186,8 milliard so‘mga ko‘paygan.
Izoh (0)