Toshkent shahar Shayxontohur tumanida 662,1 million so‘mlik sug‘urta polislaridan tushgan mablag‘ni talon-toroj qilgan shaxslar aniqlandi. Bu haqda Bosh prokuratura huzuridagi departament xabar berdi.
Ma’lum qilinishicha, Bosh prokuratura huzuridagi departamentning Shayxontohur tuman bo‘limi tomonidan tergovga qadar tekshiruv o‘tkazilgan. Tekshiruv davomida yakka tartibdagi tadbirkorlar K.D. va K.R. “A.” nomli MChJ shaklidagi sug‘urta kompaniyasining umumiy qiymati 662,1 million so‘mlik jami 5 395 dona sug‘urta polislarini bitim asosida olgani aniqlangan. Ular sug‘urta polislarini realizatsiya qilishdan tushgan mablag‘larni jamiyatga o‘tkazmasdan o‘z ehtiyojlariga sarflab, talon-toroj qilgan.
Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Buxoroda korxona rahbari tadbirkorning 1,3 mlrd so‘mlik mahsulotini o‘zlashtirib, 2 ta Damas, Toyota Hiace va Isuzu sotib olgani, Chiroqchida bankirlar 119 nafar fuqaro nomiga rasmiylashtirilgan salkam 1 mlrd so‘mni o‘zlashtirgani, Oliy va o‘rta maxsus ta’limi tizimida 9 oyda qariyb 14 mlrd so‘mlik moliyaviy kamchiliklarga yo‘l qo‘ygan 21 nafar xodim ishdan olingani to‘g‘risida xabar berilgandi.
Mavzuga doir:
- O‘zbekistondagi bog‘chalarda 9 oyda 6,6 mlrd so‘mlik ish haqi va tovarlar o‘zlashtirib yuborilgan — Maktabgacha ta’lim vazirligi
- Andijonda gaz ta’minoti xodimlari aholiga ajratilgan gaz ballonlarini talon-toroj qildi
- O‘zbekistonda 2021-yilning olti oyi ichida davlat amaldorlari tomonidan 592 mlrd so‘m talon-toroj qilingan
Izoh (0)