O‘zbekiston TIV AQShga boruvchi fuqarolarni mamlakatga kirishda qo‘shimcha talablar qo‘yilgani sabab ogohlantirdi

AQSh mamlakatga kiruvchilar uchun yangi talablar qo‘ydi, deya xabar qilmoqda O‘zbekiston Tashqi ishlar vazirligi.

AQShning Toshkentdagi elchixonasi ma’lumotlariga ko‘ra, 2021-yil 8-noyabrdan boshlab AQShga kiruvchi xorijiy mamlakatlar fuqarolari AQShga jo‘nab ketayotgan samolyotga chiqishlaridan oldin COVID-19 ga qarshi to‘liq emlanganini tasdiqlovchi hujjat taqdim etishlari shart.

Kasalliklarni nazorat qilish va oldini olish markaziga (CDC) ko‘ra, Oziq-ovqat va farmasevtika idorasi (FDA) tomonidan tasdiqlangan yoki ruxsat etilgan, shuningdek, JSST tomonidan favqulodda vaziyatlarda foydalanish uchun ro‘yxatga olingan vaksinalar Qo‘shma Shtatlarga kirish uchun maqbul deb hisoblanadi.

Bu cheklovlar immigratsiya vizasi mavjud shaxslarga, diplomatik va rasmiy kanallar orqali AQShga tashrif buyuradiganlar hamda 18 yoshgacha bo‘lgan bolalarga taalluqli emas (qo‘shimcha ma‘lumotlar elchixonaning saytida mavjud).

Shu munosabat bilan vazirlik AQShga borishni rejalashtirayotgan O‘zbekiston fuqarolariga yuqoridagi talablarni inobatga olishni tavsiya qilgan.